ബെര്ലിനിലെ റാഡിസണ് ബ്ലൂ ഹോട്ടലില് പ്രശസ്തമായ ഭീമന് അക്വേറിയം തകര്ന്ന് വീണ് വൻ അപകടം. 200,000 ഗാലന് വെള്ളവും 1,500 ട്രോപ്പിക്കല് മത്സ്യങ്ങളുമുള്ള ഭീമന് അക്വേറിയമാണിത്. 52 അടിയാണ് അക്വേറിയത്തിന്റെ ഉയരം. അപകടത്തിൽ രണ്ടുപേര്ക്കാണ് ഗുരുതരമായി പരുക്കേറ്റത്.
അപകടം സംഭവിച്ചതിന് ശേഷം വെള്ളവും ഗ്ലാസ് കഷ്ണങ്ങളും അല്പ സമയത്തിനുള്ളില് തന്നെ ഹോട്ടലിന്റെ ഉൾഭാഗത്ത് പരന്നു. ഇതോടെ ഹോട്ടലില് നിന്ന് മുന്നൂറോളം അതിഥികളെ ഒഴിപ്പിച്ചതായി അധികൃതര് അറിയിച്ചു. അതേസമയം ഭീമന് അക്വേറിയം തകര്ന്നതിന് ശേഷമുള്ള ഹോട്ടലിലെ ദൃശ്യങ്ങള് സമൂഹമാധ്യമങ്ങളില് വലിയരീതിയില് ശ്രദ്ധ നേടുകയാണ്. ബെര്ലിനിലെ താപനില അര്ദ്ധരാത്രിയോടെ മൈനസ് 14 ഡിഗ്രി ഫാരന്ഹീറ്റിലേക്ക് താഴ്ന്നു. ഇതോടെ വെള്ളം തണുത്തുറഞ്ഞതാണ് അക്വേറിയം തകരുന്നതിന് കാരണമായതെന്നാണ് പ്രാഥമിക നിഗമനം.
തകര്ന്ന അക്വേറിയത്തില് നിന്നുള്ള പത്ത് ലക്ഷം ലിറ്ററോളം വെള്ളവും മത്സ്യങ്ങളും തൊട്ടടുത്തുള്ള തെരുവിലേക്ക് ഒഴുകിപ്പോയി. നൂറോളം അഗ്നിശമന സേനാംഗങ്ങള് സ്ഥലത്തെത്തി രക്ഷാപ്രവര്ത്തനം നടത്തിവരികയാണ്. 30 അടിയോളം ഉയരമുള്ള ഫൗണ്ടേഷനിലാണ് ഈ ഭീമന് അക്വേറിയം ഘടിപ്പിച്ചിരുന്നത്. അക്വേറിയം വൃത്തിയാക്കുന്നതിനും മീനുകള്ക്ക് തീറ്റ കൊടുക്കുന്നതിനുമായി ഹോട്ടലില് നാല് ജീവനക്കാരാണ് ഉണ്ടായിരുന്നത്.
