ഷവര്‍മ നിര്‍മാണ കേന്ദ്രങ്ങളില്‍ ഭക്ഷ്യസുരക്ഷ വകുപ്പിന്റെ മിന്നല്‍ പരിശോധന. ഷവര്‍മ ഉണ്ടാക്കുന്നതില്‍ മാനദണ്ഡങ്ങള്‍ പാലിക്കുന്നുണ്ടെന്ന് ഉറപ്പ് വരുത്താന്‍ ആണ് സംസ്ഥാന വ്യാപകമായി പരിശോധന നടത്തിയതെന്ന് ആരോഗ്യമന്ത്രി വീണ ജോര്‍ജ് പറഞ്ഞു.
88 സ്‌ക്വാഡുകളായി 1287 ഷവര്‍മ വില്‍പന കേന്ദ്രങ്ങളിലാണ് പരിശോധന നടത്തിയത്. മാനദണ്ഡങ്ങള്‍ ലംഘിച്ച 148 സ്ഥാപനങ്ങളിലെ ഷവര്‍മ വില്‍പ്പന നിര്‍ത്തിവെപ്പിക്കുകയും ചെയ്തു.
178 സ്ഥാപനങ്ങള്‍ക്ക് റക്ടിഫിക്കേഷന്‍ നോട്ടീസും 308 സ്ഥാപനങ്ങള്‍ക്ക് കോമ്പൗണ്ടിംഗ് നോട്ടീസും നല്‍കിയതായി മന്ത്രി വീണ ജോര്‍ജ് അറിയിച്ചു.
പരിശോധനയില്‍ മയണൈസ് തയ്യാറാക്കുന്നതിലും വീഴ്ച വരുത്തിയ സ്ഥാപനങ്ങള്‍ക്കെതിരെ നടപടിയെടുത്തിട്ടുണ്ട്. ഇത്തരത്തില്‍ മയണൈസ് നിര്‍മാണത്തില്‍ വീഴ്ച വരുത്തിയ 146 സ്ഥാപനങ്ങള്‍ക്കെതിരെയാണ് നടപടി എടുത്തതെന്ന് ആരോഗ്യമന്ത്രി അറിയിച്ചു.
ഇത്തരത്തില്‍ ഇനിയും പല കേന്ദ്രങ്ങളിലും പരിശോധന നടത്തും. നിയമലംഘനം നടത്തുന്നവര്‍ക്കെതിരെ കര്‍ശന നിയമ നടപടികള്‍ സ്വീകരിക്കുമന്നും മന്ത്രി അറിയിച്ചു. സംസ്ഥാന ഭക്ഷ്യ സുരക്ഷ വകുപ്പ് ജോയിന്റ് കമ്മീഷണര്‍ ജോക്കബ് തോമസ്, ഡെപ്യൂട്ടി കമ്മീഷണര്‍മാരായ എസ് അജി, ജി രഘുനാഥ കുറുപ്പ്, വികെ പ്രദീപ് കുമാര്‍ എന്നിവരാണ് പരിശോധകള്‍ക്ക് നേതൃത്വം നല്‍കിയത്.
