സമഗ്ര പരിവർത്തന പദ്ധതിയായ ‘വിഷൻ 2030’-ലെ സ്വപ്ന നഗരിയായ ‘നിയോം’ യാഥാർഥ്യമാകാനിരിക്കെ അവിടെ എയർ ടാക്സികൾ ലഭ്യമാക്കുമെന്ന് നിയോം ചീഫ് എക്സിക്യൂട്ടീവ് ഓഫിസർ നദ്‌മി അൽ-നസ്ർ പറഞ്ഞു. ഈജിപ്തിലെ ശറമുശൈഖിൽ നടന്ന ഹരിത സൗദി സംരംഭക ഉച്ചകോടിയെ അഭിസംബോധന ചെയ്തു സംസാരിക്കുകയായിരുന്നു അദ്ദേഹം. പരിസ്ഥിതി സൗഹൃദ നഗരമെന്ന ലക്ഷ്യം സാക്ഷാത്കരിക്കുന്നതിന്റെ ഭാഗമായാണ് ഗതാഗതത്തിന് പറക്കും ടാക്സി സംവിധാനം ഏർപ്പെടുത്തുന്നതെന്നും അദ്ദേഹം കൂട്ടിച്ചേർത്തു. അതേസമയം നിയോം പദ്ധതി പ്രദേശത്ത് ഇതിനകം 15 ഹെലികോപ്റ്ററുകൾ ഗതാഗത ആവശ്യത്തിന് ഉപയോഗിക്കുന്നുണ്ട്.
നിയോമിലായിരിക്കും ശുദ്ധമായ പാചക ഇന്ധനവും ഹരിത ഹൈഡ്രജനും ഉൽപാദിപ്പിക്കുന്ന സൗദിയിലെ ആദ്യ കേന്ദ്രം യാഥാർഥ്യമാകുക. അന്തരീക്ഷ മലിനീകരണമില്ലാതെ സാങ്കേതികവിദ്യയുടെ കൈമാറ്റം ത്വരിതപ്പെടുത്തുന്നതിനായി ഒരു വ്യവസായിക നഗരം നിയോമിലുണ്ടെന്ന് അൽ-നസ്ർ സ്ഥിരീകരിച്ചു. ‘ദി ലൈൻ’ എന്ന് പേരിട്ടിട്ടുള്ള നിയോമിലെ അത്യാധുനിക പാർപ്പിട പദ്ധതി പൂർണമായും പരിസ്ഥിതി സൗഹൃദമായിരിക്കും. ലൈനിലെ ജനസംഖ്യാശേഷി ന്യൂയോർക്കിലെയും ലണ്ടനിലെയും ജനസാന്ദ്രതക്ക് തുല്യമാണെന്ന് സി.ഇ.ഒ വെളിപ്പെടുത്തി.
