കൊച്ചി: ഉത്തരേന്ത്യയിലെ വിവിധ നഗരങ്ങളിലേതിന് സമാനമായി കൊച്ചിയിലും മുസ്ലീം നാമധാരികൾക്ക് വീട് കിട്ടാത്ത അവസ്ഥയെന്ന് കഥാകൃത്ത് പിവി ഷാജി കുമാ‍ർ. ഫേസ്ബുക്കിലൂടെയാണ് തൻ്റെ അനുഭവം അദ്ദേഹം പങ്കുവയ്ക്കുന്നത്.
സുഹൃത്തിനൊപ്പം കൊച്ചിയിലെ കളമശ്ശേരിയിൽ വാടക വീട് നോക്കാൻ പോയപ്പോൾ ഒപ്പമുണ്ടായിരുന്ന ബ്രോക്കർ തൻ്റെ പേര് ചോദിച്ചെന്നും ഷാജിയെന്ന പേര് പറഞ്ഞപ്പോൾ മുസ്ലീമാണോ എന്ന് ചോദിച്ചെന്നും മുസ്ലീമാണെങ്കിൽ ഉടമയ്ക്ക് വീട് കൊടുക്കാൻ താത്പര്യമില്ലെന്നും പറഞ്ഞെന്നും ഷാജി കുമാ‍ർ പറയുന്നു. കൊച്ചി ഇൻഫോ പാ‍ർക്കിലെ എഞ്ചിനീയറായ ഒരാളുടെ വീടായിരുന്നു അതെന്നും ഇക്കാര്യം കേട്ടതോടെ ആ വീട്ടിൽ നിന്നും ഇറങ്ങി പോന്നുവെന്നും ഷാജി കുമാ‍ർ പറയുന്നു.
പിവി ഷാജികുമാറിൻറെ ഫേസ്ബുക്ക് പോസ്റ്റ് പൂർണ്ണരൂപം
ഇന്നലെ വൈകുന്നേരം വാടകവീട് നോക്കാൻ സുഹൃത്തിനൊപ്പം കളമശ്ശേരിയിലെ ഒരു ഹൗസിങ്ങ് കോളനിയിൽ പോയി.
ബ്രോക്കർ കൂടെയുണ്ട്. കുറേ വീടുകളുടെ കൂട്ടത്തിൽ നിൽക്കുന്ന ഒറ്റനിലവീട്. വീടിന് മുന്നിൽ പതിവുപോലെ ഉപദേശവാചകങ്ങളുമായി യേശുക്രിസ്തു ശോകഭാവത്തിൽ പടമായിട്ടുണ്ട്. മുറികൾ നോക്കുമ്പോൾ ബ്രോക്കർ ചോദിക്കുന്നു.
“പേരേന്താ..?”
“ഷാജി”
അയാളുടെ മുഖം ചുളിയുന്നു.
“മുസ്ലീമാണോ..?”
ഞാൻ ചോദ്യഭാവത്തിൽ അയാളെ നോക്കുന്നു.
“ഒന്നും വിചാരിക്കരുത് , മുസ്ലീങ്ങൾക്ക് വീട് കൊടുക്കില്ലെന്നാണ് ഓണർ പറഞ്ഞിരിക്കുന്നത്..”
“ഓ… ഓണർ എന്ത് ചെയ്യുന്നു..”
“ഇൻഫോപാർക്കിൽ.. കമ്പ്യൂട്ടർ എഞ്ചിനിയറാ..”
“ബെസ്റ്റ്..”
ഞാൻ സ്വയം പറഞ്ഞു.
ഇപ്പോഴും അയാൾ എന്റെ മതമറിയാൻ കാത്തുനിൽക്കുകയാണ്.
ഷാജിയെന്നത് സർവ്വമതസമ്മതമുള്ള പേരാണല്ലോ..
മുമ്പും രണ്ട് വട്ടം വീട് നോക്കാൻ പോയപ്പോൾ ഇതേ അനുഭവം ഉണ്ടായിട്ടുണ്ട്, ഒറ്റപ്പെട്ട സംഭവമാണെന്ന് വിചാരിച്ച് മനസിൽ നിന്ന് കളഞ്ഞതാണ്…
“എനിക്ക് വീട് വേണ്ട ചേട്ടാ…”
ഞാൻ ഇറങ്ങുന്നു.
ചുമരിലെ പാവം യേശു എന്നോട് പറയുന്നു.
“ഉത്തരേന്ത്യ കേരളത്തിലേക്ക് നടന്നുവന്നിരിക്കുന്നു…”
