സൗദി അറേബ്യയിലെ നജ്റാനിൽ 12 വയസ്സുകാരൻ ഓടിച്ച കാറിടിച്ചു പിതാവിന് ദാരുണാന്ത്യം. പ്രായപൂർത്തിയാകാത്ത തന്റെ മകനെ
ഡ്രൈവിങ് പരിശീലിപ്പിക്കാൻ ശ്രമിക്കുന്നതിനിടെയായിരുന്നു അപകടമുണ്ടായത്.
മകൻ തനിയെ കാറോടിക്കാൻ ശ്രമിക്കുന്നതിനിടെ നിയന്ത്രണം വിട്ട് പിതാവിനെ ഇടിക്കുകയായിരുന്നുവെന്ന് പ്രാദേശിക മാധ്യമങ്ങൾ റിപ്പോർട്ട് ചെയ്യുന്നു. അപകടം നടന്നയുടനെ തദ്ദേശവാസികൾ വിവരം അറിയിച്ചുവെന്ന് നജ്റാൻ റീജിയണിലെ സൗദി റെഡ് ക്രസന്റ് വക്താവ് പറയുന്നു.
കുടുംബം കിംഗ് ഫഹദ് പാർക്കിൽ വിനോദയാത്രയ്ക്കെത്തിയതായിരുന്നു. ഈ സമയത്താണ് കുട്ടി കാറെടുത്തത്. കുട്ടി വണ്ടി ഓടിക്കുന്നതിനിടയിൽ കാറിന്റെ നിയന്ത്രണം വിട്ട് 65കാരനെ ഇടിച്ചു വീഴ്ത്തുകയായിരുന്നു. ഉടൻ തന്നെ കിങ് ഖാലിദ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
