ദുബായ് ഷോപ്പിംഗ് പൂരത്തിന് നാളെ തുടക്കമാവും. ദുബായ് ഷോപ്പിങ് ഫെസ്റ്റിവലിന്റെ 28ാമത് എഡിഷനാണിത്. 46 നാൾ നീണ്ടു നിൽക്കുന്ന ഷോപ്പിംഗ് മാമാങ്കത്തിൽ ഷോപ്പിങ്ങിനൊപ്പം ദൃശ്യ – ശ്രവ്യ വിരുന്നും സമ്മാനങ്ങൾ നേടാനുള്ള അവസരവും ഒരുക്കുന്നുണ്ട്. അതേസമയം നാളെ മുതൽ ജെബിആർ ദ് ബീച്ചിൽ ഡ്രോൺ ഷോയും ആരംഭിക്കും. ദുബായുടെ പ്രതീകങ്ങളെല്ലാം ഈ ഡ്രോൺ ഷോയിലൂടെ ആകാശത്ത് തെളിയും.രാത്രി ഏഴ് മണിക്കും 10 മണിക്കും ഇടയിലായിരിക്കും ഡ്രോൺ ഷോ നടക്കുക.
ജെബിആർ ദ് ബീച്ചിൽ രാജ്യാന്തര ഷോപ്പിങ് ബ്രാൻഡുകളുടെ ഔട്ലെറ്റുകളും തുറക്കുന്നുണ്ട്. ഇതോടൊപ്പം ബീച്ച് റസ്റ്ററന്റുകളിൽ കടൽ കാഴ്ചകൾ കണ്ട് ഭക്ഷണം ആസ്വദിക്കാനുള്ള വിവിധ സൗകര്യങ്ങളും ഇതിനോടകം ഒരുങ്ങിക്കഴിഞ്ഞു. കൂടാതെ എക്സ്പോ സിറ്റി അൽവാസൽ പ്ലാസയിൽ മഞ്ഞുകൂടാരങ്ങളും തയ്യാറാക്കിയിട്ടുണ്ട്.
ഇവിടെയെത്തുന്ന കുട്ടികൾക്ക് സാന്താക്ലോസിനെ കാണാനും സാധിക്കും. അതേസമയം എക്സ്പോ സിറ്റി പെറ്റ് ഫ്രണ്ട്ലി ആയതിനാൽ വളർത്തു നായ്ക്കളുമായി പ്രവേശിക്കാനുള്ള അനുമതിയുമുണ്ട്. ജെബിആർ ബീച്ചിൽ ദിവസങ്ങൾ നീളുന്ന വെടിക്കെട്ടിനാണ് ഏവരും കാത്തിരിക്കുന്നത്. നാളെ രാത്രി 9 വരെ ഉദ്ഘാടന വെടിക്കെട്ട് ഉണ്ടാവുമെന്ന് ഔദ്യോഗിക വൃത്തങ്ങൾ അറിയിച്ചു. പിന്നീട് 25 വരെ ദിവസവും രാത്രി 8.30ന് വെടിക്കെട്ട് നടക്കും.
പുതുവർഷം പിറക്കുന്ന രാത്രി മുതൽ ജനുവരി ഒൻപത് മുതൽ 15വരെയും വെടിക്കെട്ട് ആസ്വദിക്കാം. കൂടാതെ എല്ലാ വ്യാപാര കേന്ദ്രങ്ങളിലും ഷോപ്പിങ് ഫെസ്റ്റിവൽ ഓഫറുകൾ നാളെ ആരംഭിക്കും. വിലക്കുറവും സമ്മാനങ്ങളുമാണ് മേളയുടെ ഏറ്റവും വലിയ പ്രത്യേകത.
