23-ാമത് ദുബായ് മാരത്തൺ 2024 ജനുവരി 7-ന് നടക്കും. ദുബായ് സ്‌പോർട്‌സ് കൗൺസിലിന്റെ ആഭിമുഖ്യത്തിൽ നടത്തുന്ന പരിപാടിയിൽ പ്രധാനമായും 3 മത്സരയിനങ്ങളാണ് നടക്കുക. 4 കിലോമീറ്റർ ഫൺ റൺ, 10 കിലോമീറ്റർ റോഡ് റേസ്, ക്ലാസിക് 42.195 കിലോമീറ്റർ മാരത്തൺ എന്നിങ്ങനെ മൂന്ന് മത്സരയിനങ്ങൾ.
ലോകത്തിലെ ഏറ്റവും വലിയ വാർഷിക കായിക ഇനങ്ങളിൽ ഒന്നാണ് ദുബായ് മാരത്തൺ. നിരവധിയാളുകളാണ് എല്ലാ വർഷവും ദുബായ്ജു മാരത്തണിൽ പങ്കാളികളാകാറുള്ളത്. ജുമേറ ബീച്ച് റോഡിലൂടെയും ബുർജ് അൽ അറബ്, മദീനത്ത് പ്രോപ്പർട്ടികളിലൂടെയുമാണ് 42.195 കിലോമീറ്റർ ദൂരം കടന്നുപോകുന്നത്. ദുബായ് പോലീസ് അക്കാദമിക്ക് സമീപമുള്ള ഉമ്മു സുഖീം റോഡിലാണ് പരിപാടി നടക്കുക.
ദുബായ് സ്‌പോർട്‌സ് കൗൺസിൽ, ദുബായ് പോലീസ്, ദുബായ് ആർടിഎ, ദുബായ് മുനിസിപ്പാലിറ്റി എന്നിവരുടെ സഹകരണത്തോടെയാണ് ദുബായ് മാരത്തൺ നടക്കുക. ദുബായ് നഗരത്തിലെ മാത്രം ജനസംഖ്യ 3.6 ദശലക്ഷമാണ്, ഇവിടം ഒരു സിറ്റി മാരത്തൺ നടത്തുന്നതിൽ വെല്ലുവിളികൾ ഏറെയാണ്. വെല്ലുവിളികൾക്കിടയിലും സുഗമമായി തന്നെ മാരത്തൺ വിജയിപ്പിക്കാൻ സംഘാടകർക്ക് കഴിഞ്ഞിട്ടുണ്ട്.
പാരീസിൽ നടക്കുന്ന സമ്മർ ഒളിമ്പിക്‌സിന് ആറ് മാസം മുൻപ് ഒളിമ്പിക് യോഗ്യതാ സമയം റെക്കോർഡ് ചെയ്യാനുള്ള മികച്ച അത്‌ലറ്റുകൾക്കും വളർന്നുവരുന്ന താരങ്ങൾക്കും അരങ്ങേറ്റക്കാർക്കുമുള്ള അവസരം കൂടെയാണ് ദുബായ് മാരത്തൺ. ലോകശ്രദ്ധയിൽ തങ്ങളെ എത്തിക്കാനും ദീർഘദൂര ഓട്ടത്തിൽ വിജയകരമായ കരിയറിലേക്കുള്ള വാതിലുകൾ തുറക്കാനും കഴിയുന്ന ആഗോള പരിപാടിയാണിതെന്ന് അത്‌ലറ്റുകൾക്ക് അറിയാം
“മറ്റ്‌ ഗവണ്മെന്റ് അതോറിറ്റികളുടെ സഹായമില്ലാതെ ഞങ്ങൾക്ക് എമിറേറ്റിലെ തെരുവുകളിൽ പ്രവർത്തിക്കാൻ കഴിയില്ല, മാത്രമല്ല ദുബായ് സ്‌പോർട്‌സ് കൗൺസിലിന്റെ വിലമതിക്കാനാകാത്ത ഏകോപനത്തിനും നിരന്തരമായ പിന്തുണയ്ക്കും ഞങ്ങൾ നന്ദി പറയുന്നു,” ഇവന്റ് ഡയറക്ടർ പീറ്റർ കോണർട്ടൺ പറഞ്ഞു.
4km, 10km, മാരത്തൺ എന്നീ മൂന്ന് റേസ് വിഭാഗങ്ങളിൽ ഏതെങ്കിലും ഒന്നിൽ മത്സരിക്കാൻ ആഗ്രഹിക്കുന്നവർക്ക് ഔദ്യോഗിക വെബ്സൈറ്റായ dubaimarathon.org വഴി ഓൺലൈനായി രജിസ്റ്റർ ചെയ്യാം.രജിസ്‌ട്രേഷൻ ആരംഭിച്ച് കഴിഞ്ഞു.
