എലിസബത്ത് രാജ്ഞിയുടെ സെപ്റ്റംബർ 19ന് നടക്കുന്ന സംസ്‌കാര ചടങ്ങില്‍ പങ്കെടുക്കാനായി ഇന്ത്യൻ രാഷ്ട്രപതി ദ്രൗപദി മുര്‍മു ലണ്ടനിലെത്തി. ഇന്ത്യന്‍ സര്‍ക്കാരിനെ പ്രതിനിധീകരിച്ച് രാഷ്ട്രപതി ആദരാഞ്ജലികള്‍ അർപ്പിക്കും. ദ്രൗപദി മുര്‍മുവിൻ്റെ ലണ്ടനിൽ എത്തിച്ചേർന്നതായി രാഷ്ട്രപതി ഭവന്‍ ട്വീറ്റ് ചെയ്തിരുന്നു.
രാഷ്ട്രപതി മൂന്ന് ദിവസം ലണ്ടനിലുണ്ടാകും. സംസ്‌കാര ചടങ്ങിലും ചാള്‍സ് മൂന്നാമൻ്റെ ക്ഷണപ്രകാരം വിരുന്നിലും പങ്കെടുക്കും. ലോകനേതാക്കള്‍ക്കായി ബക്കിങ്ഹാം കൊട്ടാരത്തിലാണ് ഞായറാഴ്ച വിരുന്ന്.
സെപ്തംബര്‍ 8നായിരുന്നു എലിസബത്ത് രാജ്ഞി സ്‌കോട്ട്‌ലൻ്റിലെ ബാല്‍മോറല്‍ കൊട്ടാരത്തില്‍ വച്ച് അന്തരിച്ചത്. തിങ്കളാഴ്ചയാണ് രാജ്ഞിയുടെ സംസ്‌കാര ചടങ്ങുകള്‍.
സെപ്തംബര്‍ 12ന് ഇന്ത്യന്‍ വിദേശകാര്യമന്ത്രി ഡോ. എസ് ജയ്ശങ്കര്‍ ഇന്ത്യയിലെ ബ്രിട്ടീഷ് ഹൈക്കമ്മീഷന്‍ സന്ദര്‍ശിച്ച് രാജ്ഞിയുടെ വിയോഗത്തിൽ അനുശോചനം അറിയിച്ചിരുന്നു.
