ഫെബ്രുവരി 14 ന് പ്രണയദിനത്തിൽ പശുവിനെ കെട്ടിപ്പിടിച്ചുകൊണ്ട് ‘കൗ ഹഗ് ഡേ’ ആയി ആചരിക്കണമെന്ന സർക്കുലർ കേന്ദ്രം പിൻവലിച്ചു. കേന്ദ്ര മൃഗക്ഷേമ ബോർഡിന്റെതാണ് തീരുമാനം. 2023 ഫെബ്രുവരി 14 ന് പശു ആലിംഗന ദിനം ആചരിക്കാനായി അനിമൽ വെൽഫെയർ ബോർഡ് ഓഫ് ഇന്ത്യയാണ് സർക്കുലർ നൽകിയിരുന്നത്. ഈ സർക്കുലറാണ് ഇന്ന് പിൻവലിച്ചുകൊണ്ട് ഉത്തരവിറക്കിയത്.
അതേസമയം കോംപിറ്റന്റ് അതോറിറ്റിയുടെയും ഫിഷറീസ്, മൃഗസംരക്ഷണ, ക്ഷീര മന്ത്രാലയത്തിന്റെയും നിർദ്ദേശപ്രകാരം സർക്കുലർ പിൻവലിച്ചു. കേന്ദ്ര മൃഗക്ഷേമ ബോർഡാണ് ഇതു സംബന്ധിച്ചു പുറത്തു വിട്ട പ്രസ്താവനയിൽ ഇക്കാര്യം അറിയിച്ചത്. ജനുവരി ആറിനായിരുന്നു പ്രണയദിനം ‘കൗ ഹഗ് ഡേ’ ആയി ആചരിക്കണമെന്ന് ആവശ്യപ്പെട്ട് കേന്ദ്ര മൃഗസംരക്ഷണ വകുപ്പ് പ്രഖ്യാപിച്ചത്.
ഇന്ത്യൻ സംസ്‌കാരത്തിന്റെയും ഗ്രാമീണ സമ്പദ് വ്യവസ്ഥയുടെയും നട്ടെല്ലാണ് പശുവെന്ന് പറഞ്ഞായിരുന്നു പ്രഖ്യാപനം. ഇതിനിടെ കൗ ഹഗ് ഡേ ഉത്തരവിനെ അനുകൂലിച്ച് ഉത്തർപ്രദേശ് മൃഗസംരക്ഷണ വകുപ്പ് മന്ത്രിയും രംഗത്തെത്തിയിരുന്നു. കൂടാതെ പശുവിനെ കെട്ടിപ്പിടിക്കുന്നത് ബി പി നിയന്ത്രിക്കുമെന്ന് ധരംപാൽ സിങ് പറഞ്ഞതും വിവാദമായിരുന്നു. എന്നാൽ പ്രഖ്യാപനം ഉണ്ടായത് മുതൽ നിരവധി പേർ സമൂഹമാധ്യമങ്ങളിലും മറ്റുമായി ട്രോളുകളും പരിഹാസ പ്രസ്താവനകളും പങ്കുവയ്ക്കുകയും ചെയ്തു.
