തിരുവനന്തപുരം: സംസ്ഥാനത്തെ കോര്പ്പറേഷന് മേയര്, മുനിസിപ്പാലിറ്റി ചെയര്പേഴ്സണ് തെരഞ്ഞെടുപ്പുകള് ഡിസംബർ 26ന് നടക്കും. രാവിലെ 10.30നാകും തെരഞ്ഞെടുപ്പ് നടക്കുക. ഉച്ചയ്ക്ക് 2.30ന് ശേഷം ഡെപ്യൂട്ടി മേയറെയും ഡെപ്യൂട്ടി ചെയര്പേഴ്സണ്മാരെയും തെരഞ്ഞെടുക്കും.
തദ്ദേശ തെരഞ്ഞടുപ്പില് വിജയിച്ച അംഗങ്ങളുടെ സത്യപ്രതിജ്ഞ ഈ മാസം 21ന് ( ഞായറാഴ്ച) നടക്കും. ഗ്രാമ, ബ്ലോക്ക്, ജില്ലാ പഞ്ചായത്ത് പ്രസിഡന്റ് സ്ഥാനത്തേക്കുള്ള തെരഞ്ഞെടുപ്പ് 27ന് രാവിലെ 10.30നും വൈസ് പ്രസിഡന്റ് തിരഞ്ഞെടുപ്പ് 2.30നും നടക്കും. വോട്ടവകാശമുള്ള അംഗങ്ങളുടെ എണ്ണത്തിന്റെ പകുതിയാണ് ക്വാറം വേണ്ടത്. ക്വാറമില്ലെങ്കില് തൊട്ടടുത്ത പ്രവൃത്തിദിവസം തന്നെ യോഗം ചേര്ന്ന് ക്വാറം ഇല്ലാതെ തെരഞ്ഞെടുപ്പ് നടത്താവുന്നതുമാണ്.
തദ്ദേശ തെരഞ്ഞെടുപ്പു നടപടികള് പൂര്ത്തിയായതോടെ മാതൃകാ പെരുമാറ്റച്ചട്ടം പിന്വലിച്ചു. സ്ഥാനാര്ഥികളുടെ മരണത്തെത്തുടര്ന്ന് മൂന്നു വാര്ഡുകളില് തെരഞ്ഞെടുപ്പ് മാറ്റിവച്ചിരുന്നു. അതിനാല് മലപ്പുറം ജില്ലയിലെ മൂത്തേടം, എറണാകുളം ജില്ലയിലെ പാമ്പാക്കുട ഗ്രാമ പഞ്ചായത്തുകളിലും തിരുവനന്തപുരം കോര്പ്പറേഷനിലെ 66ാം ഡിവിഷനായ വിഴിഞ്ഞത്തും തെരഞ്ഞെടുപ്പ് പൂര്ത്തിയാകുന്നതുവരെ മാതൃകാപെരുമാറ്റചട്ടം നിലനില്ക്കുന്നതായിരിക്കും.
