മധ്യപ്രദേശില് ബി.ജെ.പി നേതാവ് മുഖത്ത് മൂത്രമൊഴിച്ച ആദിവാസി യുവാവിന്റെ കാല് കഴുകി മുഖ്യമന്ത്രി ശിവരാജ് സിംഗ് ചൗഹാന്. ഇന്ന് രാവിലെ മുഖ്യമന്ത്രി ഭോപ്പാലിലെ വസതിയില് വെച്ചാണ് ദശ്മത് റാവത്ത് എന്ന യുവാവിന്റെ കാല് മുഖ്യമന്ത്രി കഴുകിയത്. ഇതിന്റെ ദൃശ്യങ്ങള് ട്വിറ്ററില് പങ്കുവെക്കുകയും ചെയ്തിട്ടുണ്ട്.
യുവാവിനെ കസേരയിലിരുത്തി കാല് കഴുകിയ ശേഷം യുവാവിന് മധുരവും ഗണപതി വിഗ്രഹവും നല്കി. കഴുത്തില് മാലയും അണിയിച്ചു. തുടര്ന്ന് യുവാവുമായി സംസാരിക്കുന്നതും എ.എന്.ഐ പങ്കുവെച്ച വീഡിയോയില് കാണാം.
यह वीडियो मैं आपके साथ इसलिए साझा कर रहा हूँ कि सब समझ लें कि मध्यप्रदेश में शिवराज सिंह चौहान है, तो जनता भगवान है।
किसी के साथ भी अत्याचार बर्दाश्त नहीं किया जायेगा। राज्य के हर नागरिक का सम्मान मेरा सम्मान है। pic.twitter.com/vCuniVJyP0
— Shivraj Singh Chouhan (@ChouhanShivraj) July 6, 2023
ആ വീഡിയോ കണ്ട് വേദന തോന്നിയെന്നും താന് മാപ്പ് ചോദിക്കുന്നുവെന്നും ശിവരാജ് സിംഗ് ചൗഹാന് ട്വിറ്ററില് പങ്കുവെച്ച ഫോട്ടോയില് പറയുന്നു. ജനം ദൈവമാണെന്നും ജനങ്ങളോടുള്ള ആക്രമണങ്ങള് കണ്ടുനില്ക്കില്ലെന്നും മുഖ്യമന്ത്രി പറഞ്ഞു.
ദശ്മത് റാവത്തിന്റെ മുഖത്ത് മൂത്രമൊഴിക്കുന്ന ബിജെപി നേതാവ് പര്വേഷ് ശുക്ലയുടെ വീഡിയോ വലിയ തോതില് സോഷ്യല് മീഡിയയില് പ്രചരിച്ചിരുന്നു. പര്വേഷ് ശുക്ലയെ ചൊവ്വാഴ്ച പൊലീസ് ദേശീയ സുരക്ഷ നിയമത്തിന്റെ പരിധിയില് അറസ്റ്റ് ചെയ്യുകയും ചെയ്തിരുന്നു.
അതേസമയം നവംബറില് സംസ്ഥാനം തെരഞ്ഞെടുപ്പിനെ നേരിടും. തെരഞ്ഞെടുപ്പ് അടുത്തിരിക്കെയാണ് ഇത്തരത്തിലുള്ള നീക്കമെന്ന വിമര്ശനവും ഉയരുന്നുണ്ട്.
