കേരളത്തിന്റെ ഫുട്ബോള് സ്നേഹം അംഗീകരിച്ചതിന് ഫിഫയ്ക്ക് നന്ദി അറിയിച്ച് മുഖ്യമന്ത്രി പിണറായി വിജയൻ. കോഴിക്കോട് പുള്ളാവൂര് പുഴയില് സ്ഥാപിച്ച ലയണൽ മെസി, നെയ്മർ, ക്രിസ്റ്റ്യാനോ റൊണാൾഡോ എന്നിവരുടെ കൂറ്റൻ കട്ടൗട്ടിന്റെ ചിത്രം ഫിഫ ഔദ്യോഗിക ട്വിറ്റർ അക്കൗണ്ടിലൂടെ പങ്കുവച്ചിരുന്നു. ഇതിനു മറുപടിയായാണ് ട്വിറ്ററിലൂടെ മുഖ്യമന്ത്രി നന്ദി പ്രകടിപ്പിച്ചത്.
കേരളവും കേരളീയരും എക്കാലവും ഫുട്ബോളിനെ സ്നേഹിച്ചിട്ടുള്ളവരാണെന്ന് മുഖ്യമന്ത്രി പറഞ്ഞു. ഖത്തർ ലോകകപ്പ് വേദികൾക്ക് ചുറ്റും കേരളീയരുടെ ആവേശം കാണാനാകുമെന്നും ഫിഫയ്ക്ക് മറുപടി നൽകിയ ട്വിറ്ററിൽ അദ്ദേഹം വ്യക്തമാക്കി.
ഇന്നലെ വൈകിട്ടോടെയാണ് പുള്ളാവൂർ പുഴയിലെ കട്ടൗട്ടുകളുടെ ചിത്രം ഫിഫ പങ്കുവെച്ചത്. ‘ഫിഫ ലോകകപ്പ് ജ്വരം കേരളത്തെ ബാധിച്ചിരിക്കുന്നു, ലോകകപ്പിന് മുന്നോടിയായി നെയ്മർ, ക്രിസ്റ്റ്യാനോ റൊണാൾഡോ, ലയണൽ മെസി എന്നിവരുടെ കൂറ്റൻ കട്ടൗട്ടുകൾ ഒരു ചെറു പുഴയുടെ നടുവിൽ ഉയർത്തിയിരിക്കുന്നു’ – ട്വിറ്ററിലെ ഔദ്യോഗിക പേജിൽ ചിത്രം പങ്കുവെച്ചുകൊണ്ട് ഫിഫ കുറിച്ച വാക്കുകളാണിത്.
Kerala and Keralites have always loved football and it is on full display with #Qatar2022 around the corner. Thank you @FIFAcom for acknowledging our unmatched passion for the sport. https://t.co/M4ZvRiZUvh
— Pinarayi Vijayan (@pinarayivijayan) November 8, 2022
