ചിക്കന് ടിക്ക മസാല എല്ലാവർക്കും വളരെയധികം ഇഷ്ടമുള്ള ഭക്ഷണമാണ്. ഈ രുചിയുള്ള ഭക്ഷണം ആദ്യമായി തയാറാക്കിയ സ്കോട്ടിഷ് കറി കിങ് സൂപ്പര് അലി അസ്ലം (77) അന്തരിച്ചു. കുറച്ച് നാളുകളായി അസുഖബാധിതനായിരുന്നു. 1970ൽ ഗ്ലാസ്ഗോയിൽ ഷിഷ് മഹല് റെസ്റ്റോറന്റ് നടത്തി വന്നിരുന്ന കാലത്താണ് അപ്രതീക്ഷിതമായി അലി അഹമ്മദ് അസ്ലം ചിക്കന് ടിക്ക മസാലക്കൂട്ട് കണ്ടെത്തിയത്. വിഭവം ഹിറ്റായതോടെ അലിയെ ആളുകള് ആദരസൂചകമായി സൂപ്പര് അലി എന്ന് വിളിക്കാന് തുടങ്ങി.
എന്നാൽ ഈ വിഭവത്തിന്റെ പിറവിയ്ക്ക് മുന്നിൽ വ്യത്യസ്തമായ ഒരു കഥയുണ്ട്. അലിയുടെ ഹോട്ടലിലെത്തിയ ഒരാള് ചിക്കന് കറി ഡ്രൈ ആയിപ്പോയതിന് പരാതി പറഞ്ഞു. അലിയെ ചീത്ത പറഞ്ഞുകൊണ്ടിരുന്ന കസ്റ്റമറുടെ മനസ് കവരാന് തൈര്, സോസ്, ക്രീം, മസാലകള് എന്നിവ ചേര്ത്ത് അലി പെട്ടന്ന് തന്നെ ചിക്കന് ഗ്രേവി തയാറാക്കി. കറി കൊള്ളാമെന്ന് തോന്നിയതോടെ വിഭവം ഹോട്ടല് മെനുവില് ഉള്പ്പെടുത്തുകയും ചെയ്തു. അലിയുടെ ചിക്കന് ടിക്ക മസാല നാടെങ്ങും സൂപ്പര് ഹിറ്റാകുകയും ചെയ്തു. ഇന്ന് വിവിധ നാടുകളിൽ ഒരുപാട് പേരുടെ ഇഷ്ട ഭക്ഷണമാണ് ചിക്കൻ ടിക്ക മസാല.
