റിലീസിന് മുൻപേ ഏറെ ചർച്ചയായ സിനിമയാണ് ഷാരൂഖ് നായകനായ ബോളിവുഡ് ചിത്രം പഠാൻ. സിനിമയിലേതായി പുറത്തിറങ്ങിയ ഗാനരംഗത്തിൽ നായികയായ ദീപിക പദുക്കോൺ ധരിച്ച വസ്ത്രത്തെചൊല്ലി വിവാദങ്ങൾ ഉണ്ടായിരുന്നു. ഇപ്പോഴിതാ ജനുവരി 25 ന് പുറത്തിറങ്ങാനിരിക്കുന്ന ചിത്രങ്ങൾ മാറ്റങ്ങൾ വേണമെന്ന് നിർദ്ദേശിച്ചിരിക്കുകയാണ് സെൻസർ ബോർഡ്. സിനിമയിലും ഗാനങ്ങളിലും ഉൾപ്പെടെ മാറ്റങ്ങൾ വരുത്തണമെന്നും പുതുയ പതിപ്പ് സമർപ്പിക്കാനും സെൻട്രൽ ബോർഡ് ഓഫ് ഫിലിം സർട്ടിഫിക്കേഷൻ (സിബിഎഫ്സി) നിർമ്മാതാക്കളോട് നിർദ്ദേശിച്ചതായി ചെയർപേഴ്സൺ പ്രസൂൺ ജോഷി വ്യക്തമാക്കി.
സിനിമയിലെ വിവാദ ഗാനവും മറ്റ് രംഗങ്ങളും ഉൾപ്പെടെ മാറ്റങ്ങൾ വരുത്തിയതിനു ശേഷം പുതുക്കിയ പതിപ്പ് തിയറ്റർ റിലീസിന് മുമ്പ് സിബിഎഫ്സിക്ക് സമർപ്പിക്കണം. അതേസമയം സിനിമയുടെ ഒ ടി ടി അവകാശം ആമസോണ് പ്രൈം സ്വന്തമാക്കിയിട്ടുണ്ട്. 250 കോടിരൂപ മുതൽമുടക്കുള്ള ചിത്രത്തിന്റെ ആഗോള അവകാശം 100 കോടി രൂപയ്ക്കാണ് ആമസോണ് സ്വന്തമാക്കിയത്.
ജനുവരി 25ന് പുറത്തിറങ്ങുന്ന ചിത്രം ഒ ടി ടി യില് മാര്ച്ച് അവസാന വാരമോ ഏപ്രില് ആദ്യമോ ആയിരിക്കും എത്തുക. ചിത്രത്തിലെ ‘ബേഷാരം രംഗ്’ എന്ന ഗാനരംഗത്തിൽ ദീപിക പദുകോണിന്റെ ഓറഞ്ച് നിറത്തിലുള്ള ബിക്കിനിയെച്ചൊല്ലിയായിരുന്നു വിവാദം ഉയര്ന്നിരുന്നത്. 2018ല് പുറത്തിറങ്ങിയ സീറോയ്ക്ക് ശേഷം തിയറ്റര് റിലീസിനൊരുങ്ങുന്ന ഷാറൂഖ് ചിത്രമാണ് പഠാൻ എന്നതും പ്രത്യേകതയാണ്.
