ലഹരിക്കെതിരായ സർക്കാർ ക്യാമ്പയിന്റെ ഭാഗമായി ഇന്ന് ലക്ഷങ്ങൾ അണിനിരക്കുന്ന ലഹരിവിരുദ്ധ ശൃംഖല സംഘടിപ്പിക്കും. പകൽ മൂന്നിന്‌ ഓരോ വാർഡിലെയും വിദ്യാലയങ്ങളും ഓഫീസുകളും കേന്ദ്രീകരിച്ചാണ്‌ ശൃംഖല തീർക്കുക.
തിരുവനന്തപുരത്ത് മുഖ്യമന്ത്രി പിണറായി വിജയൻ സംസ്ഥാനതല ഉദ്ഘാടനം നിർവഹിക്കും. ഗാന്ധി പാർക്ക് മുതൽ അയ്യൻകാളി സ്ക്വയർവരെ അഞ്ച് കിലോമീറ്ററിൽ മന്ത്രിമാരും ജനപ്രതിനിധികളും കാൽ ലക്ഷത്തോളം വിദ്യാർഥികളും പൊതുജനങ്ങളും കണ്ണിചേരും.
ഒക്ടോബർ ആറിന്‌ ആരംഭിച്ച ക്യാമ്പയിന്റെ ആദ്യഘട്ടമാണ്‌ നവംബർ ഒന്നിന്‌ സമാപിക്കുന്നത്‌. ഇന്ന് പകൽ മൂന്നിന്‌ ശൃംഖല തീർത്ത്‌ ലഹരി വിരുദ്ധ പ്രതിജ്ഞ ചൊല്ലും. പരിപാടിയിൽ എല്ലാവരും പങ്കാളികളാകണമെന്ന് തദ്ദേശമന്ത്രി എം ബി രാജേഷ്‌ അഭ്യർഥിച്ചു. ഒരേസമയം ഇത്രയുമധികം ആളുകൾ മയക്കുമരുന്നിനെതിരെ അണിചേരുന്നത്‌ ലോകത്തുതന്നെ അപൂർവമായിരിക്കുമെന്നും മന്ത്രി പറഞ്ഞു.
