മമ്മൂട്ടിയെ കേന്ദ്ര കഥാപാത്രമാക്കി ജിയോ ബേബി സംവിധാനം ചെയ്ത കാതലിനെ പ്രശംസിച്ച് നടനും സംവിധായകനുമായ അനൂപ് മേനോന്‍. ഈ മഹത്തായ സൃഷ്ടിക്ക് തീവ്ര സിനിമ പ്രേമിയില്‍ നിന്നും നന്ദി എന്നാണ് അനൂപ് മേനോന്‍ പറഞ്ഞത്. ഫേസ്ബുക്കിലായിരുന്നു പ്രതികരണം.
അനൂപ് മേനോന്റെ ഫേസ്ബുക്ക് പോസ്റ്റ്:
കാതല്‍ കണ്ടു. …ഒറിജിനല്‍ മലയാളം സിനിമ തെലുങ്കിലെയും ബോളിവുഡിലെയും ബുദ്ധിശൂന്യമായ മസാല നിരക്കുകളിലേക്ക് കുതിച്ചുയരുന്ന ഒരു സമയത്ത്, സംവിധായകന്‍ ജിയോ ബേബിയും എഴുത്തുകാരായ ആദര്‍ശും പോള്‍സണും ചേര്‍ന്ന് കെ ജി ജോര്‍ജിനെപ്പോലുള്ള ധാര്‍മികതയും ചാരുതയും തിരികെ കൊണ്ടുവന്നിരിക്കുകയാണ്. പത്മരാജന്‍, ലോഹിതദാസ്, ഭരതന്‍, എംടി എന്നിവര്‍ മലയാള സിനിമയ്ക്ക് സമ്മാനിച്ച സിനിമകള്‍ നമ്മള്‍ എന്താണെന്ന് ലോകത്തിനുമുമ്പില്‍ കാട്ടിക്കൊടുത്തിരുന്നു.
കാതലില്‍, ഇത്രയും സൂക്ഷ്മമായ ഒരു വിഷയത്തെ ഇവര്‍ മൂവരും എത്ര സമര്‍ത്ഥമായാണ് കൈകാര്യം ചെയ്തിരിക്കുന്നത്. മാത്യുവിന്റെയും ഓമനയുടെയും പ്രണയകഥ ഭൗതികതയെ മറികടക്കുന്നു. ഓമന പോയി കഴിഞ്ഞ് ഏകാന്തമായ അടുക്കളയിലേക്ക് നോക്കുന്ന മാത്യുവിന്റെ ട്രാക്ക് ഷോട്ട് വളരെ വേദനിപ്പിക്കുന്നതാണ്.
ചിത്രത്തിലെ പശ്ചാത്തല സംഗീതവും ഛായാഗ്രഹണവും മികവുറ്റതായിരുന്നു. ഒരു വേനല്‍മഴയ്ക്കിടയില്‍ മാത്യുവും തങ്കനും കണ്ടുമുട്ടുന്ന സ്‌ക്വയറിലെ രംഗം നമ്മുടെ ഏറ്റവും കാവ്യാത്മക നിമിഷങ്ങളില്‍ ഒന്നായി മാറും. പിന്നെ മമ്മൂക്ക സാധ്യമായ എല്ലാ തരം സിനിമകളിലും തുല്യ ധൈര്യത്തോടെ മുന്നേറാന്‍ കഴിയുന്ന ഒരേയൊരു നടന്‍ എന്ന നിലയില്‍ നിങ്ങള്‍ എന്നെന്നേക്കുമായി ഓര്‍മ്മിക്കപ്പെടും…നിങ്ങളുടെ താരപരിവേഷം നല്‍കിയില്ലായിരുന്നെങ്കില്‍ ജിയോയ്ക്ക് കാതല്‍ ഇത്രയും വലിയ പ്രേക്ഷകരിലേക്കെത്താന്‍ കഴിയുമായിരുന്നില്ല. ഈ മഹത്തായ സൃഷ്ടിക്ക് ഒരു തീവ്ര സിനിമ പ്രേമിയില്‍ നിന്നും നന്ദി.
