നെഹ്റു ട്രോഫി വള്ളംകളി ഉദ്ഘാടന ചടങ്ങിലേക്കുള്ള സംസ്ഥാന സർക്കാരിന്റെ ക്ഷണം നിരസിച്ച് കേന്ദ്ര ആഭ്യന്തരമന്ത്രി അമിത് ഷാ. ഈ മാസം നാലിന് നടക്കുന്ന പരിപാടിയിൽ പങ്കെടുക്കാതെ മൂന്നിന് തന്നെ അമിത് ഷാ മടങ്ങും. ഇത് വ്യക്തമാക്കുന്ന അമിത് ഷായുടെ പ്രോഗ്രാം ചാർട്ട് പുറത്തിറങ്ങി.
ഓഗസ്റ്റ് 30 മുതല് സെപ്റ്റംബര് മൂന്നു വരെ കോവളത്ത് നടക്കുന്ന ദക്ഷിണ മേഖല കൗണ്സില് യോഗത്തില് പങ്കെടുക്കാനാണ് നാളെ അമിത് ഷാ തിരുവനന്തപുരത്ത് എത്തുക. മറ്റന്നാൾ തിരികെ ഡൽഹിയിലേക്കും പോകും. ഔദ്യോഗിക തിരക്കുകൾ കാരണമാണ് അദ്ദേഹം ഉൽഘാടന ചടങ്ങിൽ പങ്കെടുക്കാത്തതെന്നാണ് വിശദീകരണം.
നെഹ്റു ട്രോഫി വള്ളം കളിക്ക് കേന്ദ്ര ആഭ്യന്തര മന്ത്രി അമിത് ഷായെ കഴിഞ്ഞ ദിവസമാണ് മുഖ്യമന്ത്രി പിണറായി വിജയന് ക്ഷണിച്ചത്. മുഖ്യാതിഥിയായി എത്തിച്ചേരാനും ഓണാഘോഷങ്ങളില് പങ്കെടുക്കാനും 23ന് മുഖ്യമന്ത്രിയുടെ ഓഫിസില് നിന്നയച്ച കത്തില് ആവശ്യപ്പെട്ടിരുന്നു. എന്നാൽ അമിത് ഷായെ ക്ഷണിച്ചതിൽ ആക്ഷേപവുമായി പ്രതിപക്ഷവും രംഗത്തെത്തിയിരുന്നു.
