യുഎഇ ബഹിരാകാശ സഞ്ചാരി സുൽത്താൻ അൽനെയാദി സഹാറ മരുഭൂമിയിൽ ആഞ്ഞടിക്കുന്ന മണൽക്കാറ്റിൻ്റെ ചിത്രങ്ങൾ പങ്കുവച്ചു.
ബഹിരാകാശത്ത് ചിത്രങ്ങളെടുക്കാനാണ് തനിക്കേറ്റവും ഇഷ്ടമെന്ന അടിക്കുറിപ്പോടെയാണ് സുൽത്താൻ അൽനെയാദി ചിത്രങ്ങൾ പങ്കുവച്ചിരിക്കുന്നത്.
“ഇത്ര ദൂരെ നിന്ന് നമ്മുടെ ഗ്രഹത്തിൻ്റെ സൗന്ദര്യം ഞാൻ നിരന്തരം ഓർമ്മിക്കുന്നു,” എന്ന് കുറിച്ചിരിക്കുന്നു.
അന്താരാഷ്ട്ര ബഹിരാകാശ നിലയത്തിലെ പ്രിയപ്പെട്ട ജോലികളിലൊന്ന്, ബഹിരാകാശത്ത് നിന്ന് മാത്രം കാണാൻ കഴിയുന്ന അതിമനോഹരമായ കാഴ്ചകൾ പകർത്തി ഭൗമനിരീക്ഷണം നടത്തുന്നതാണെന്നും അൽനെയാദി ട്വിറ്ററിൽ കുറിച്ചു.
“മനോഹരമായ സഹാറയിൽ ഉടനീളം വീശിയടിക്കുന്ന മണൽക്കാറ്റിന്റെ ഈ പുതിയ ചിത്രം ഞാൻ സന്തോഷപൂർവം പങ്കിടുന്നു.”
From so far away, I am constantly reminded of the beauty of our planet. One of my favourite activities on the ISS is getting behind the lens for Earth observation, capturing breathtaking sights that can only be witnessed from space.
I'm delighted to share this recent image I… pic.twitter.com/n6TslNNXQL
— Sultan AlNeyadi (@Astro_Alneyadi) March 30, 2023
ഭൂമിയിലെ ഏറ്റവും വാസയോഗ്യമല്ലാത്ത സ്ഥലങ്ങളിൽ ഒന്നാണ് സഹാറ. വടക്കേ ആഫ്രിക്കയിൽ 9,200,000 ചതുരശ്ര കിലോമീറ്റർ വ്യാപിച്ചുകിടക്കുന്ന സഹാറ ലോകത്തിലെ ഏറ്റവുമധികം ചൂടുള്ള മരുഭൂമിയാണ്. എങ്കിലും, 6,000 വർഷങ്ങൾക്ക് മുൻപ് അത് ജീവൻ കൊണ്ട് നിറഞ്ഞിരുന്നതായി 2021 ൽ ശാസ്ത്രജ്ഞർ വെളിപ്പെടുത്തിയിരുന്നു.
കഴിഞ്ഞ ദിവസം ബഹിരാകാശ നിലയത്തിൽ നിന്ന് ഈജിപ്തിൻ്റെ ഒരു വീഡിയോയും ഡോ. അൽ നെയാദി ട്വിറ്ററിൽ പങ്കിട്ടിരുന്നു. കെയ്‌റോ താൻ ജീവിതത്തിൽ ഇതുവരെ സന്ദർശിച്ച ഏറ്റവും മനോഹരമായ നഗരങ്ങളിലൊന്നാണെന്ന് അദ്ദേഹം കുറിച്ചു.
