അന്തരിച്ച സി പി ഐ എം നേതാവും മുൻ മന്ത്രിയുമായിരുന്ന കോടിയേരി ബാലകൃഷ്ണന്റെ ഓര്മകള്ക്കായി കുടുംബാംഗങ്ങള് ഒരിടമൊരുക്കി. കോടിയേരി ഉപയോഗിച്ചിരുന്ന വസ്തുക്കളും കോടിയേരിയുടെ കൈയ്യെഴുത്ത് പ്രതികളും 15 മിനുട്ട് ദൈര്ഘ്യമുള്ള കോടിയേരിയെ സംബന്ധിക്കുന്ന ഹ്രസ്വ ചിത്രവും പ്രദര്ശിപ്പിക്കാനായി മിനി തിയറ്ററും ഉൾപ്പെടെയുള്ള ഒരു മുറി കോടിയേരി വീട്ടില് കുടുംബാംഗങ്ങള് ഒരുക്കിയിരിക്കുകയാണ്.
ഇന്ന് മുഖ്യമന്ത്രി പിണറായി വിജയനും ഭാര്യ കമലയും കോടിയേരിയുടെ വീട്ടില് സന്ദര്ശനം നടത്തി. സ്പീക്കര് എ.എന്.ഷംസീര്, സി.പി.ഐ.എം കണ്ണൂര് ജില്ലാ സെക്രട്ടറി എം.വി.ജയരാജന്, സി.പി.ഐ.എം തലശ്ശേരി ഏരിയ സെക്രട്ടറി സി.കെ രമേശന് എന്നിവരും കോടിയേരിയുടെ ഓര്മ്മകള്ക്ക് ജീവൻ നൽകുന്ന ഈ ഇടം കാണാനെത്തിയിരുന്നു. അതേസമയം രാവിലെ 11 മണി മുതല് വൈകുന്നേരം 5 മണി വരെ പൊതുജനങ്ങള്ക്ക് പ്രദര്ശനം കാണുന്നതിനുള്ള അവസരവും ഒരുക്കിയിട്ടുണ്ടെന്ന് കുടുംബാംഗങ്ങള് അറിയിച്ചു.
