ഖത്തർ ഫുട്ബോൾ ലോകകപ്പിലെ മികച്ച ഗോൾ തെരഞ്ഞെടുപ്പ് ഫിഫ. സെർബിയയ്ക്ക് എതിരെ ബ്രസീലിന്റെ റിച്ചാർലിസൺ നേടിയ അക്രോബാറ്റിക് സ്റ്റൈൽ ഗോളാണ് ലോകകപ്പിലെ മികച്ച ഗോൾ.
ആരാധകർക്കിടയിൽ നടത്തിയ വോട്ടെടുപ്പിലൂടെയാണ് മികച്ച ഗോൾ കണ്ടെത്തിയത്. എംബാപ്പെ, നെയ്മർ, എൻസോ ഫെർണാണ്ടസ്, മെസി എന്നിവരുടേത് അടക്കം ശ്രദ്ധിക്കപ്പെട്ട 10 ഗോളുകളുടെ പട്ടികയിൽ നിന്നാണ് ഈ ഗോൾ തെരഞ്ഞെടുക്കപ്പെട്ടത്.
സെർബിയയ്ക്കെതിരായ മത്സരത്തിന്റെ 73-ാം മിനിറ്റിൽ വിനീഷ്യസ് ജൂനിയറിന്റെ പാസിലൂടെയായിരുന്നു റിച്ചാർലിസൺ അതിമനോഹരമായ ബൈസിക്കിൾ കിക്കിലൂടെ ഗോൾ നേടിയത്. 25 കാരനായ റിച്ചാർലിസൺ ലോകകപ്പിൽ ബ്രസീലിനായി മികച്ച പ്രകടനം പുറത്തെടുത്തിരുന്നു. ഇംഗ്ലീഷ് പ്രീമിയർ ലീഗിൽ ടോട്ടനം ഹോട്സ്പറിന്റെ താരമാണ് റിച്ചാർലിസൺ.
