അബുദാബിയിലെ നിർമാണ മേഖലയിൽ ജോലി ചെയ്യുന്ന എൻജിനീയർമാർക്ക് റജിസ്ട്രേഷൻ നിർബന്ധമാക്കി. സർക്കാരിന്റെ ഓൺലൈൻ പോർട്ടലായ ടാം പ്ലാറ്റ്ഫോമിലാണ് റജിസ്റ്റർ ചെയ്യേണ്ടതെന്ന് അബുദാബി നഗരസഭ അറിയിച്ചു. ഈ റജിസ്ട്രേഷൻ കാർഡ് ഉള്ളവരെ മാത്രമേ നിർമാണ മേഖലയിൽ എൻജിനീയറായി ജോലി ചെയ്യാൻ അനുവദിക്കൂ.
നിർമാണ മേഖലയുടെ സേവന ഗുണനിലവാരവും സുരക്ഷയും പ്രഫഷനൽ മികവും ഉയർത്തുകയാണ് ലക്ഷ്യം. സിവിൽ, ഇലക്ട്രിക്കൽ, മെക്കാനിക്കൽ, ആർക്കിടെക്ചറൽ എൻജിനീയർമാരും റജിസ്റ്റർ ചെയ്യണം. തുല്യതാ സർട്ടിഫിക്കറ്റോ റജിസ്ട്രേഷൻ കാർഡോ ഉള്ളവർക്കു മാത്രമേ എൻജിനീയർ വീസ ലഭിക്കൂ. മറ്റു തസ്തികയിൽ ഉള്ളവർക്ക് എൻജിനീയറായി ജോലി ചെയ്യാൻ പാടില്ല.
നിർമാണ മേഖലയിൽ 3 വർഷത്തെ പരിചയമുള്ളവർക്ക് പ്രാക്ടീസിങ് എൻജിനീയർ എന്നും അല്ലാത്തവർക്ക് ട്രെയ്നി എൻജിനീയർ എന്ന കാർഡുമാണ് ലഭിക്കുക. ടാം പോർട്ടലിന്റെ വെബ്സൈറ്റിൽ പേര്, മേൽവിലാസം, വിദ്യാഭ്യാസ യോഗ്യത, കമ്പനിയുടെ പേര്, മേൽവിലാസം, ബന്ധപ്പെടാനുള്ള നമ്പർ, ഇമെയിൽ തുടങ്ങിയ വിവരങ്ങൾ നൽകി റജിസ്റ്റർ ചെയ്യണം. യോഗ്യത, തൊഴിൽ പരിചയ സർട്ടിഫിക്കറ്റുകൾ തെളിയിക്കുന്ന രേഖകൾ അപ് ലോഡ് ചെയ്യണം.
അംഗീകൃത സ്ഥാപനങ്ങളിൽനിന്നുള്ള എൻജിനീയർ ബിരുദ സർട്ടിഫിക്കറ്റോ സെമസ്റ്റർ സംവിധാനത്തിൽ 160 ക്രെഡിറ്റ് അവേഴ്സ്, ക്വാട്ടേർലി സിസ്റ്റത്തിൽ 250 ക്രെഡിറ്റ് അവേഴ്സ് യൂറോപ്യൻ സിസ്റ്റത്തിൽ 36 യൂണിറ്റ് എന്നിവ ലഭിച്ച രേഖ അപ് ലോഡ് ചെയ്യണം. മാർക്ക് ലിസ്റ്റ്, പാസ്പോർട്ട്, സാക്ഷ്യപ്പെടുത്തിയ തൊഴിൽ പരിചയ സർട്ടിഫിക്കറ്റ് എന്നിവയാണ് വേണ്ടത്. വിദേശ രാജ്യങ്ങളിലാണ് തൊഴിൽ പരിചയമെങ്കിൽ വിദേശകാര്യമന്ത്രാലയം സാക്ഷ്യപ്പെടുത്തണം.
