ആരാധകർക്ക് ഫുട്ബോൾ പ്ലയേഴ്സിനോടുള്ള ഇഷ്ടം അതിരുകളില്ലാത്തതാണ്. പ്രത്യേകിച്ച് കേരളത്തിലെ ഫുട്ബോൾ ആരാധകർ. ഖത്തർ ലോകകപ്പ് തുടങ്ങിയതോടെ പല സ്ഥലങ്ങളിലായി പല വലുപ്പത്തിലുള്ള ഫുട്ബോൾ താരങ്ങളുടെ കട്ട് ഔട്ടുകളാണ് വിവിധ ആരാധകർ സ്ഥാപിച്ചിട്ടുള്ളത്. ഇപ്പോഴിതാ ലക്ഷദ്വീപിലെ കവരത്തിയിലെ അർജന്റീന ആരാധകനായ മുഹമ്മദ് സാദിഖ് ക്രൊയേഷ്യയുമായുള്ള സെമി ഫൈനൽ നടക്കുന്നതിനു തൊട്ടു മുൻപ് ഒരു പ്രഖ്യാപനം നടത്തി. കളിയിൽ തന്റെ ഇഷ്ട ടീമായ അർജന്റീന ജയിച്ചാൽ ആഹ്ലാദ സൂചകമായി കടലിനടയിലും മെസ്സിയുടെ കട്ടൗട്ട് സ്ഥാപിക്കുമെന്ന്.
അതേസമയം ലോകമെമ്പാടുമുള്ള അർജന്റീന ആരാധകർ ആഗ്രഹിച്ചതു പോലെ ഏകപക്ഷീയമായ മൂന്നു ഗോളിന് മെസ്സിപ്പട ജയിച്ച് ഫൈനലിലെത്തുകയും ചെയ്തു. ഇപ്പോഴിതാ മുഹമ്മദ് സാദിഖ് വാക്ക് പാലിച്ചിരിക്കുകയാണ്. അറബിക്കടലിനടയിൽ 15 മീറ്റർ താഴ്ചയിൽ ക്യാപ്റ്റൻ ലയണൽ മെസ്സിയുടെ ഒരു കട്ടൗട്ട് അവർ സ്ഥാപിച്ചു കഴിഞ്ഞു. ആഴക്കടലിനു തൊട്ടു മുൻപുള്ള ‘അദ്ഭുതമതിൽ’ എന്നറിയപ്പെടുന്ന സ്ഥലത്തെ പവിഴപ്പുറ്റുകൾക്കിടയിലാണ് കട്ട് ഔട്ട് സ്ഥാപിച്ചിരിക്കുന്നത്. സ്കൂബാ ടീമിന്റെ സഹായാവും ഇവർക്ക് ലഭിച്ചിരുന്നു.
അതേസമയം കടലിനടയിലുള്ള മെസ്സിയുടെ ഈ കട്ടൗട്ട് ചിത്രങ്ങളും വിഡിയോകളും ഇപ്പോൾ സമൂഹമാധ്യമങ്ങളിൽ വൈറലാണ്. ലക്ഷദ്വീപിന് അർജന്റീനയോടുള്ള സ്നേഹം ലോകമറിയട്ടെ എന്ന ലക്ഷ്യത്തോടു കൂടിയാണ് ഇങ്ങനെയൊരു സാഹസത്തിനു മുതിർന്നതെന്ന് സ്വാദിഖ് പറഞ്ഞു. കവരത്തിയിലെ സർക്കാർ സ്കൂളിൽ കായികവിഭാഗത്തിൽ ജീവനക്കാരനാണ് സ്വാദിഖ്. കൂടാതെ ലക്ഷദ്വീപിൽ നിന്നുള്ള ചിത്രങ്ങളും വിഡിയോകളും പങ്കുവയ്ക്കുന്ന വ്ലോഗർ കൂടിയാണിദ്ദേഹം.
