വൈവിധ്യമാർന്ന വിശ്വാസങ്ങളുടെ നാടാണ് ഇന്ത്യ. എന്നാൽ എല്ലാവരുടെയും മതസ്വാതന്ത്ര്യം സംരക്ഷിക്കുന്നതിനുള്ള പ്രതിബദ്ധത രാജ്യം ഉയർത്തിപ്പിടിക്കാൻ തയ്യാറാകണമെന്ന് ഇന്ത്യയോട് ആവശ്യപ്പെട്ടിരിക്കുകയാണ്. യു.എസ്. ചൈന, പാകിസ്താൻ, മ്യാൻമർ എന്നിവയുൾപ്പെടെയുള്ള 12 രാജ്യങ്ങളിലെ മതസ്വാതന്ത്ര്യത്തിന്റെ നിലവിലെ അവസ്ഥയെക്കുറിച്ച് പ്രത്യേക ആശങ്കയുള്ള രാജ്യങ്ങൾ ആയി യു.എസ് സ്റ്റേറ്റ് സെക്രട്ടറി ആന്റണി ബ്ലിങ്കൻ വെള്ളിയാഴ്ച പ്രഖ്യാപിച്ചു.
ലോകമെമ്പാടുമുള്ള സർക്കാരും അധികാരികളും വിശ്വാസങ്ങളുടെ പേരിൽ വ്യക്തികളെ ഉപദ്രവിക്കുകയും ഭീഷണിപ്പെടുത്തുകയും ചെയ്യുന്നുണ്ട്. പലരെയും ജയിലിലടക്കുകയും കൊല്ലുകയും ചെയ്യുന്നു. എന്നാൽ എന്തുകൊണ്ടാണ് ഇന്ത്യയെ മനുഷ്യാവകാശ പ്രശ്‌നത്തിൽ പ്രത്യേക ഉത്കണ്ഠയുള്ള രാജ്യമായി യു.എസ് സർക്കാർ പ്രഖ്യാപിക്കാത്തത് എന്ന ചോദ്യത്തിന് മറുപടിയായാണ് യു എസ് ഇക്കാര്യം വ്യക്തമാക്കിയത്. ഇന്ത്യ ലോകത്തിലെ ഏറ്റവും വലിയ ജനാധിപത്യ രാജ്യമാണെന്നും വൈവിധ്യമാർന്ന വിശ്വാസങ്ങളുടെ ആസ്ഥാനമാണെന്നും സ്റ്റേറ്റ് ഡിപ്പാർട്ട്‌മെന്റ് വക്താവ് നെഡ് പ്രൈസ് മറുപടി പറഞ്ഞു.
അന്താരാഷ്ട്ര മതസ്വാതന്ത്ര്യത്തെക്കുറിച്ചുള്ള വാർഷിക റിപ്പോർട്ടിൽ ഇന്ത്യയെ സംബന്ധിച്ചിടത്തോളം യു എസ് ശ്രദ്ധിച്ച ചില ആശങ്കകളുടെ രൂപരേഖ നൽകി. എല്ലാ രാജ്യങ്ങളിലെയും മതസ്വാതന്ത്ര്യ സാഹചര്യത്തെ യു എസ് ശ്രദ്ധാപൂർവ്വമാണ് നിരീക്ഷിക്കുന്നത്. അതിൽ ഇന്ത്യയും ഉൾപ്പെടുന്നുണ്ടെന്ന് പ്രൈസ് വ്യക്തമാക്കി. അതേസമയം മതസ്വാതന്ത്ര്യം സംരക്ഷിക്കാനുള്ള പ്രതിബദ്ധത ഉയർത്തിപ്പിടിക്കാൻ ബൈഡൻ ഭരണകൂടം ഇന്ത്യൻ സർക്കാരിനെ പ്രോത്സാഹിപ്പിക്കുന്നത് തുടരുമെന്നും അദ്ദേഹം കൂട്ടിച്ചേർത്തു. ലോകത്തിലെ ഏറ്റവും വലിയ രണ്ട് ജനാധിപത്യ രാജ്യങ്ങളായ അമേരിക്കയും ഇന്ത്യയും ശാശ്വതമായ ഒരു പദ്ധതിക്ക് പ്രതിജ്ഞാബദ്ധരാണെന്നും പ്രൈസ് പറഞ്ഞു.
