ഒറ്റത്തവണ ഉപയോഗിക്കാവുന്ന പ്ലാസ്റ്റിക് ബാഗുകൾക്ക് നിരോധനം ഏർപ്പെടുത്തി ഉമ്മുൽ ഖുവൈൻ. 2023 ജനുവരി ഒന്ന് മുതലാണ് നിരോധനം. എമിറേറ്റിലെ സെയിൽസ് ഔട്ട്‌ലെറ്റുകൾ ഒറ്റത്തവണ ഉപയോഗിക്കുന്ന എല്ലാ പ്ലാസ്റ്റിക് ബാഗുകൾക്കും 25 ഫിൽസ് ചാർജ് ഈടാക്കുമെന്നും എക്‌സിക്യൂട്ടീവ് കൗൺസിൽ വ്യക്തമാക്കി.
പൂർണ നിരോധനത്തിന് മുന്നോടിയായാണ് ഒറ്റത്തവണ മാത്രം ഉപയോഗിക്കാവുന്ന പ്ലാസ്റ്റിക് ബാഗുകൾക്ക് താരിഫ് ഏർപ്പെടുത്തുന്നതെന്നും അധികൃതർ അറിയിച്ചു. ഒറ്റത്തവണ ഉപയോഗിക്കുന്ന പ്ലാസ്റ്റിക് ബാഗുകൾക്ക് പകരം പുനരുപയോഗിക്കാവുന്ന ബാഗുകൾ ഉപയോഗിക്കാന്‍ ഉപഭോക്താക്കളെ പ്രോത്സാഹിപ്പിക്കുകയും പ്ലാസ്റ്റിക്കിന് പകരം സുസ്ഥിരമായ ബദലുകൾ ഉപയോഗിക്കുന്നതിന്റെ പ്രാധാന്യത്തെക്കുറിച്ച് ബോധവൽക്കരണവും സംഘടിപ്പിക്കും.
ഈ വർഷം ജൂൺ 1ന് അബുദാബി ഒറ്റത്തവണ ഉപയോഗിക്കുന്ന പ്ലാസ്റ്റിക് ബാഗുകൾക്ക് നിരോധനം ഏർപ്പെടുത്തിയിരുന്നു. ഷാര്‍ജ, അജ്മാന്‍ എന്നിവിടങ്ങളിലും 2024 ജനുവരി മുതല്‍ പൂര്‍ണ നിരോധനം നടപ്പാക്കും.
