കുവൈത്തില് ആത്മഹത്യാ ഭീഷണി മുഴക്കിയ 13 പ്രവാസികളെ നാടുകടത്തും. സാല്മീയയിലെ കെട്ടിടത്തിന്റെ 25ാം നിലയില് നിന്ന് താഴേക്ക് ചാടുമെന്നായിരുന്നു ഭീഷണി. മാസങ്ങളായി ശമ്പളം ലഭിച്ചില്ലെന്നാരോപിച്ചായിരുന്നു പ്രവാസികളുടെ ആത്മഹത്യാ ഭീഷണി. 13 പേരെയും സുരക്ഷാസേന ആത്മഹത്യാശ്രമത്തിൽ നിന്ന് പിന്തിരിപ്പിച്ചെങ്കിലും ഇവർക്ക് ഇനി കുവൈത്തിൽ തുടരാനാകില്ല. നാടുകടത്തൽ നടപടികൾ അധികൃതർ ആരംഭിച്ചിട്ടുണ്ട്.
കുവൈത്തില് സന്ദര്ശക വിസയില് എത്തിയ ശേഷം ജോലി ചെയ്തത് നിയമലംഘനമാണെന്ന് അധികൃതര് അറിയിച്ചു. അതിന്റെ പേരിലാണ് ഇവര്ക്കെതിരെ നടപടിയെടുക്കുന്നത്. സന്ദര്ശക വിസയില് എത്തിയവരെ നിയമവിരുദ്ധമായി ജോലിക്ക് നിയോഗിച്ച കമ്പനിക്കെതിരെയും നിയമ നടപടികള് സ്വീകരിച്ചിട്ടുണ്ട്. അതേസമയം തുര്ക്കി പൗരന്മാര്ക്ക് രാജ്യത്തിന്റെ ഏത് അതിര്ത്തി വഴി വേണമെങ്കിലും സന്ദര്ശക വിസയില് കുവൈത്തില് പ്രവേശിക്കാമെന്നും എന്നാല് തൊഴില് നിയമ പ്രകാരം അവര്ക്ക് ജോലി ചെയ്യാന് സാധിക്കില്ലെന്നും കുവൈത്ത് അധികൃതര് അറിയിച്ചു.
