സൗദിയിൽ വൻ വികസന പദ്ധതിയൊരുക്കി കിരീടാവകാശിയും പ്രധാനമന്ത്രിയുമായ മുഹമ്മദ് ബിൻ സൽമാൻ. സൗദി ഡൗൺടൗൺ ‘ എന്ന പേരിലാണ് 12 നഗരങ്ങളിലായി വലിയ രീതിയിലുള്ള വികസന പദ്ധതികൾക്ക് തുടക്കം കുറിക്കുന്നത്.
മദീന, അൽ ഖോബാർ, അൽ അഹ്സ, ബുറൈദ, നജ്റാൻ, ജിസാൻ, ഹാഈൽ, അൽ ബാഹ, അറാർ, താഇഫ്, ദൗമത്തുൽ ജൻദൽ, തബൂക്ക് എന്നിവിടങ്ങളിലാണ് പുതിയ വികസന പദ്ധതി നടപ്പാക്കുന്നത്. പബ്ലിക് ഇൻവെസ്റ്റ്മെന്റ് ഫണ്ട് ഉപയോഗിച്ച് 10 ലക്ഷം ചതുരശ്ര മീറ്ററിൽ നഗര വികസനം നടപ്പാക്കുകയാണ് കമ്പനിയുടെ ലക്ഷ്യം.
സ്വകാര്യ മേഖലയ്ക്കും നിക്ഷേപകർക്കും പങ്കാളിത്തം നൽകി ചില്ലറ വ്യാപാര സമുച്ചയങ്ങൾ, വിനോദ കേന്ദ്രങ്ങൾ, പാർപ്പിട പദ്ധതികൾ തുടങ്ങിയവയുടെ നിർമാണത്തിന് എസ് ഡി സിയാണ് നേതൃത്വം നൽകുന്നത്. സൗദിയുടെ പ്രാദേശിക സംസ്കാരങ്ങളിൽ നിന്നും പരമ്പരാഗത വാസ്തു രീതികളിൽ നിന്നും പ്രചോദനമുൾക്കൊണ്ടാണ് നഗര വികസനം നടപ്പിലാക്കുക. അതേസമയം സാങ്കേതിക വിദ്യയുടെ സാധ്യതകൾ പരമാവധി പ്രയോജനപ്പെടുത്തുകയും ചെയ്യും.
സ്വകാര്യ മേഖലക്ക് പുതിയ അവസരങ്ങൾക്ക് ലഭ്യമാക്കുന്നതിനും പുതിയ തൊഴിലാവസരങ്ങൾ സൃഷ്ടിക്കാനും പുതിയ പദ്ധതി സഹായകമാവും. സംരംഭകരുടെ വൈധഗ്ധ്യം പ്രദേശികമായി ഉപയോഗപ്പെടുത്ത തരത്തിലായിരിക്കും ധാരണകൾ രൂപപ്പെടുത്തുക. കൂടാതെ വിഷൻ 2030 ന്റെ ലക്ഷ്യങ്ങൾക്ക് അനുസൃതമായി സമ്പദ് വ്യവസ്ഥയുടെ വൈവിധ്യം ത്വരിതപ്പെടുത്താനും എണ്ണയിതര വരുമാന സ്രോതസ്സുകൾ വർധിപ്പിക്കാനും കൂടി വികസന പദ്ധതി ലക്ഷ്യമിടുന്നു.
