അബുദാബി: അപ്രതീക്ഷിതമായി എത്തിയ മഴ കനത്ത ചൂടിൽ വലഞ്ഞ യുഎഇയിലെ ജനങ്ങൾക്ക് ആശ്വാസമായി. അബുദാബി, ദുബായ്, ഷാർജ എന്നീ എമിറേറ്റുകളിലെല്ലാം നല്ല മഴയാണ് ലഭിച്ചത്. ഇതോടെ കഴിഞ്ഞ ദിവസങ്ങളിൽ ഉയർന്നു നിന്ന ചൂടിനും ആശ്വാസമായി. തണ്ണുപ്പുള്ള പ്രഭാതത്തിലേക്കാാണ് ഇന്ന് യുഎഇ നിവാസികൾ ഉണർന്നത്.
മഴയ്ക്കൊപ്പം രാജ്യത്ത് താപനിലയും കുറഞ്ഞു. റാസൽഖൈമയിലെ ജെയ്സ് പർവതനിരയിൽ പുലർച്ചെ 12 മണിയോടെ താപനില 11.6 ഡിഗ്രി സെൽഷ്യസ് വരെ താഴ്ന്നു. മഴയുടെ മനോഹരമായ ദൃശ്യങ്ങൾ കാലാവസ്ഥാ നിരീക്ഷണ ഏജൻസിയായ സ്റ്റോം സെന്റർ സോഷ്യൽ മീഡിയയിലൂടെ പങ്കുവെച്ചിട്ടുണ്ട്.
ഇന്ന് അന്തരീക്ഷം ഭാഗികമായി മേഘാവൃതമായിരിക്കും. ചിലയിടങ്ങളിൽ ആകാശം പൂർണ്ണമായും മേഘങ്ങൾക്കിടയിലാകാൻ സാധ്യതയുണ്ട്. അബുദാബിയിൽ പരമാവധി 30 ഡിഗ്രി സെൽഷ്യസും ദുബായിൽ 29 ഡിഗ്രി സെൽഷ്യസും ഷാർജയിൽ 28 ഡിഗ്രി സെൽഷ്യസും താപനില രേഖപ്പെടുത്തും. രാത്രിയിൽ ഇത് 20-21 ഡിഗ്രി വരെ താഴാൻ സാധ്യതയുണ്ട്.
ബുധനാഴ്ച രാത്രിയിലും വ്യാഴാഴ്ച പുലർച്ചെയും തീരപ്രദേശങ്ങളിലും ഉൾപ്രദേശങ്ങളിലും ഈർപ്പം വർദ്ധിക്കാനും മൂടൽമഞ്ഞിനും സാധ്യതയുണ്ട്. നേരിയതോ മിതമായതോ ആയ കാറ്റ് വീശാൻ സാധ്യതയുണ്ട്. അറേബ്യൻ ഗൾഫിൽ കടൽ താരതമ്യേന ശാന്തമായിരിക്കും. എന്നാൽ ഒമാൻ കടലിൽ രാവിലെ തിരമാലകൾ ശക്തമാകാനും കടൽ പ്രക്ഷുബ്ധമാകാനും സാധ്യതയുള്ളതിനാൽ ജാഗ്രത പാലിക്കണമെന്ന് അധികൃതർ അറിയിച്ചു.
