തിരുവനന്തപുരം :CMRL എക്സാലോജിക് മാസപ്പടി കേസിൽ മുഖ്യമന്ത്രി പിണറായി വിജയന്റെ മകൾ വീണ വിജയന്റെ മൊഴി രേഖപ്പെടുത്തി SFIO. കഴിഞ്ഞ ബുധനാഴ്ച്ച ചെന്നൈയിൽ വെച്ചാണ് മൊഴി എടുത്തത്.
അന്വേഷണ ഉദ്യോഗസ്ഥനായ അരുണ് പ്രസാദാണ് മൊഴി രേഖപ്പെടുത്തിയത്. കേസില് അന്വേഷണം ഏറ്റെടുത്ത് മാസങ്ങള്ക്കിപ്പുറമാണ് മൊഴി രേഖപ്പെടുത്തുന്നത്. കഴിഞ്ഞ ജനുവരിയിലാണ് കേസില് എസ്എഫ്ഐഒ അന്വേഷണം പ്രഖ്യാപിച്ചത്. ചെന്നൈയിലെ ഓഫീസില് എത്തിയാണ് വീണ വിജയന് മൊഴി നല്കിയത്. എക്സാലോജിക്കിന് മാസപ്പടിയായി പണം ലഭിച്ചുവെന്നായിരുന്നു ആരോപണം.
സി എം ആർ എൽ വീണ വിജയൻ്റെ ഉടമസ്ഥതയിലുള്ള എക്സാലോജിക് സൊലൂഷ്യൻസ് എന്ന കമ്പനിക്ക് നൽകാത്ത സേവനത്തിന് 2017- 20 കാലയളവിൽ വലിയ തുക പ്രതിഫലം നൽകി എന്ന ഇൻ്ററിം സെറ്റിൽമെൻ്റ് ബോർഡിൻ്റെ കണ്ടെത്തലാണ് മാസപ്പടി വിവാദമായത്. CMRL നിന്ന് കൈപ്പറ്റിയ പണത്തിന് വീണ GST അടച്ചതായി നികുതി വകുപ്പിന്റെ കണ്ടെത്തലും പുറത്ത് വന്നിരുന്നു.
