തിരുവനന്തപുരം: മേയർ ആര്യാ രാജേന്ദ്രൻ,മന്ത്രി മുഹമ്മദ് റിയാസ്,സ്പീക്കര് എ.എന്. ഷംസീർ എന്നിവർക്കെതിരെ രൂക്ഷ വിമർശനവുമായി സിപിഎം ജില്ലാ കമ്മിറ്റി.മേയറുടെ പെരുമാറ്റം അഹങ്കാരം നിറഞ്ഞതാണെന്നും അത് പൊതു ജനങ്ങൾക്കിടയിൽ അവമതിപ്പുണ്ടാക്കിയെന്നുമാണ് കമ്മിറ്റിയിലെ പ്രധാന വിമർശനം.
നഗരത്തിലെ റോഡുകളുടെ ശോചനീയാവസ്ഥ ചൂണ്ടിക്കാട്ടിയ കടകംപള്ളി സുരേന്ദ്രനോടുള്ള മന്ത്രി മുഹമ്മദ് റിയാസിന്റെ പ്രതികരണം ശരിയായില്ലെന്നും റിയാസ് മുതിര്ന്ന നേതാക്കളോട് ബഹുമാനമില്ലാതെ സൂപ്പര് മുഖ്യമന്ത്രി കളിക്കുന്നുവെന്നും വിമര്ശനമുണ്ടായി. സ്പീക്കര് എ.എന്.ഷംസീറിനു തലസ്ഥാനത്ത് കമ്യൂണിസ്റ്റ് രീതിക്ക് നിരക്കാത്ത ബന്ധങ്ങളുണ്ടെന്നും കമ്മിറ്റിയില് വിമര്ശനം ഉയര്ന്നു.
മുഖ്യമന്ത്രിയും സ്പീക്കറും സാധാരണ പാര്ട്ടിക്കാര്ക്ക് അപ്രാപ്യരും വ്യവസായികള്ക്ക് പ്രാപ്യരുമായെന്നായിരുന്നു ആരോപണം. സ്പീക്കര്ക്ക് ബിജെപി ബന്ധമുള്ള വ്യവസായിയുമായിവരെ ബന്ധമുണ്ട്. ഇത് ശരിയല്ലെന്നും നേതാക്കള് പറഞ്ഞു.
