അബുദാബി: അബുദാബി രാജകുടുംബാംഗം ശൈഖ് താനൂൻ ബിൻ മുഹമ്മദ് അൽ നഹ്യാൻ അന്തരിച്ചു. യുഎഇ പ്രസിഡൻ്റ് ഷെയ്ഖ് മുഹമ്മദിൻ്റെ അമ്മാവനായ ശൈഖ് താനൂൻ ബിൻ മുഹമ്മദ് അൽ നഹ്യാൻ അൽ ഐനിൽ അബുദാബിയുടെ പ്രതിനിധി കൂടിയായിരുന്നു. ശൈഖ് തനൂൻ്റെ നിര്യാണത്തെ തുടർന്ന് യുഎഇയിൽ ഏഴ് ദിവസത്തെ ഔദ്യോഗിക ദുഖാചരണം പ്രഖ്യാപിച്ചിട്ടുണ്ട്.
യുഎഇയുടെ സ്ഥാപക പിതാവ് അന്തരിച്ച ശൈഖ് സായിദ് ബിൻ സുൽത്താൻ അൽ നഹ്യാൻ്റെ അടുത്ത സഹയാത്രികനായിരുന്ന ഷെയ്ഖ് തഹ്നൂൻ. 1966 സെപ്റ്റംബർ 11 ന്,കൃഷി വകുപ്പിൻ്റെ ചെയർമാനും അൽ ഐൻ മുനിസിപ്പാലിറ്റിയുടെ ചെയർമാനുമായി അദ്ദേഹം ഔദ്യോഗിക ജീവിതം ആരംഭിച്ചു.
യുണൈറ്റഡ് അറബ് എമിറേറ്റ്സിൻ്റെ രൂപീകരണത്തിൽ ഷെയ്ഖ് തഹ്നൂൻ നിർണായക പങ്ക് വഹിച്ചിരുന്നു. 1971 ഡിസംബർ 2 ന് യൂണിയൻ സാധ്യമാകുന്നതിൽ അദ്ദേഹത്തിന്റെ ഇടപെടൽ പ്രധാനമായിരുന്നു. 1971 ഓഗസ്റ്റ് 9 ന് അബുദാബി എമിറേറ്റിൻ്റെ കിഴക്കൻ മേഖലയിലെ ഭരണാധികാരിയുടെ പ്രതിനിധിയായി അദ്ദേഹം നിയമിതനായി.
1972ൽ അബുദാബി ഫണ്ട് ഫോർ ഡെവലപ്‌മെൻ്റ് ആൻഡ് അറബ് ഇക്കണോമിയുടെ (നിലവിൽ അബുദാബി ഫണ്ട് ഫോർ ഡെവലപ്‌മെൻ്റ് ) ഡയറക്ടർ ബോർഡ് അംഗമായി അദ്ദേഹം നിയമിതനായി. 1973-ൽ നാഷണൽ ഓയിൽ കമ്പനി (ADNOC) ഡയറക്ടറായും അദ്ദേഹം പ്രവർത്തിച്ചു.
അബുദാബി ഇൻവെസ്റ്റ്‌മെൻ്റ് അതോറിറ്റി അതിൻ്റെ ഡയറക്ടർ ബോർഡ് രൂപീകരിച്ചപ്പോൾ, ഷെയ്ഖ് തഹ്‌നൂനെ ഒരു അംഗമായി നിയമിച്ചു. പിന്നീട് 1980-ൽ അദ്ദേഹത്തിൻ്റെ അംഗത്വം പുതുക്കി.
1977-ൽ അബുദാബി എമിറേറ്റിൻ്റെ എക്‌സിക്യൂട്ടീവ് കൗൺസിലിൻ്റെ ഡെപ്യൂട്ടി ചെയർമാനായും അൽ ഐനിലെ കൃഷി വകുപ്പിൻ്റെയും മുനിസിപ്പാലിറ്റികളുടെയും ചെയർമാനുമായി. 1988-ൽ സുപ്രീം പെട്രോളിയം കൗൺസിൽ അംഗമായും യുഎഇ പ്രസിഡൻ്റ് അദ്ദേഹത്തെ നിയമിച്ചു.
അൽ ഐനിലെ ജനങ്ങളുമായി അടുത്ത ബന്ധം പുലർത്തിയ ആളായിരുന്നു ഷെയ്ഖ് തഹ്നൂൻ ബിൻ മുഹമ്മദ് അൽ നഹ്യാൻ. 2018 നവംബറിൽ അൽ ഐനിൽ നിന്നും ദുബായിലേക്കുള്ള റോഡിന് അദ്ദേഹത്തിൻ്റെ പേര് നൽകിയിരുന്നു.
ഷെയ്ഖ് തഹ്നൂന് പത്ത് ആൺമക്കളുണ്ടായിരുന്നു. ഷെയ്ഖ് സായിദ് ബിൻ സുൽത്താൻ അൽ നഹ്യാൻ്റെ സഹോദരി ഷെയ്ഖ ഹെസ്സയുടെ വിവാഹത്തിലൂടെ ഷെയ്ഖ് സായിദ് ബിൻ സുൽത്താൻ അൽ നഹ്യാൻ്റെ ഭാര്യാ സഹോദരനായത്.
യുഎഇ പ്രസിഡൻ്റിനും അൽ നഹ്യാൻ കുടുംബത്തിനും എമിറേറ്റ്സ് ജനതയേയും ഈ ഘട്ടത്തിൽ എൻ്റെ അനുശോചനം അറിയിക്കുന്നു. ദൈവം അദ്ദേഹത്തോട് കരുണ കാണിക്കുകയും അവൻ്റെ വിശാലമായ പൂന്തോട്ടത്തിൽ അവനെ വസിപ്പിക്കുകയും ക്ഷമയും ആശ്വാസവും നൽകുകയും ചെയ്യട്ടെ. ഞങ്ങൾ ദൈവത്തിൻ്റേതാണ്, അവനിലേക്ക് തന്നെ ഞങ്ങൾ മടങ്ങിവരും – ഷെയ്ഖ് തഹ്‌നൂനോടുള്ള ആദരസൂചകമായി, വൈസ് പ്രസിഡൻ്റും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് എക്‌സിൽ കുറിച്ചു.
