തിയറ്റര്‍ ഉടമകളുടെ സംഘടനയായ ഫിയോക് പ്രഖ്യാപിച്ച സമരത്തില്‍ ആവശ്യപ്പെടുന്ന കാര്യങ്ങള്‍ നിലവില്‍ അനുവദിക്കാന്‍ സാധിക്കില്ലെന്ന് പ്രൊഡ്യൂസേഴ്‌സ് അസോസിയേഷന്‍ ട്രഷററും ഡിസ്ട്രിബ്യൂഷന്‍ അസോസിയേഷന്‍ പ്രസിഡന്റുമായ ലിസ്റ്റിന്‍ സ്റ്റീഫന്‍. ഫിയോക് ചെയര്‍മാനായ ദിലീപിന്റെ ചിത്രം റിലീസ് ചെയ്യാനൊരുങ്ങുന്നുണ്ടെന്നും, ഫിയോക്കിന്റെ സമരത്തില്‍ അതുകൊണ്ട് തന്നെ അവ്യക്തതയുണ്ടെന്നും ലിസ്റ്റിന്‍ സ്റ്റീഫന്‍ പറഞ്ഞു. മീഡിയ വണ്ണിനോടായിരുന്നു പ്രതികരണം.
എല്ലാ ഫിയോക് അംഗങ്ങളുടെയും അനുമതിയോടെയാണ് സമരം പ്രഖ്യാപിച്ചതെന്ന് കരുതുന്നില്ല. പല ആളുകളും തീര്‍ത്തും ഇതിനെതിരാണ്. മാത്രമല്ല എല്ലാ തീയേറ്ററുകളും ഹൗസ്ഫുള്‍ ആയി ഓടിക്കൊണ്ടിരിക്കുന്ന സാഹചര്യത്തില്‍ വലിയ ഏത് ആര്‍ടിസ്റ്റിന്റെ ചിത്രം വന്നാലും റിലീസ് ചെയ്യാന്‍ കഴിയുന്ന സാഹചര്യമല്ല ഉള്ളതെന്നും അതിനാല്‍ തന്നെ ഇത് നിലവില്‍ തങ്ങളെ ബാധിക്കില്ലെന്നും ലിസ്റ്റിന്‍ സ്റ്റീഫന്‍ പറഞ്ഞു.
ലിസ്റ്റിന്‍ സ്റ്റീഫന്റെ വാക്കുകള്‍
ഫിയോകിന്റെ സമരത്തെക്കുറിച്ച് ഒരു മാധ്യമത്തില്‍ കൂടിയാണ് അറിഞ്ഞത്. ഞങ്ങളെ നിലവില്‍ ഇത് ബാധിക്കുന്നില്ല. കാരണം ഇത് എല്ലാ ഫിയോക് അംഗങ്ങളുടെയും അനുമതിയോടെ പറഞ്ഞതാണെന്ന് ഞങ്ങള്‍ക്ക് തോന്നുന്നില്ല. പല ആളുകളും തീര്‍ത്തും ഇതിനെതിരാണ്. നാല് സിനിമകളും ഓടിക്കൊണ്ടിരിക്കുന്ന സാഹചര്യത്തില്‍ ഇനിമുതല്‍ പടം റിലീസ് ചെയ്യില്ല എന്ന് പറയുന്നതും ഇനി അഥവാ റിലീസ് പ്ലാന്‍ ചെയ്താല്‍ തന്നെ റിലീസ് ചെയ്യാന്‍ പറ്റില്ല എന്നതും ഒരു വാസ്തവമാണ്. കാരണം കേരളത്തില്‍ ഇപ്പോള്‍ എല്ലാ തീയേറ്ററുകളും ഹൗസ്ഫുള്‍ ആയി ഓടിക്കൊണ്ടിരിക്കുകയാണ്. ഈ സാഹചര്യത്തില്‍ ഏത് വലിയ ആര്‍ടിസ്റ്റിന്റെ സിനിമ വന്നാലും റിലീസ് ചെയ്യാന്‍ സാധിക്കാത്ത സാഹചര്യമാണ്.
ഇവര്‍ പറയുന്ന പല കാര്യങ്ങളും സാധ്യതയില്ലാത്തതാണ്. തിയേറ്റര്‍ റിലീസ് ചെയ്ത് 42 ദിവസങ്ങള്‍ക്ക് ശേഷമേ സിനിമ ഓടിടിയില്‍ റിലീസ് ചെയ്യാവൂ എന്നാണ് അവര്‍ ആവശ്യപ്പെട്ടിരിക്കുന്നത്. അത് സാധ്യമല്ല. ഫിലിം ചേംബറില്‍ ഈ വിഷയം ചര്‍ച്ച ചെയ്യുന്ന കാര്യമാണ്. നിലവില്‍ ഇവര്‍ ആവശ്യപ്പെടുന്ന ഒന്നിനും ചെയ്തുകൊടുക്കാന്‍ തയ്യാറല്ല. ചര്‍ച്ച വരട്ടെ. ഫിയോകിന്റെ ചെയര്‍മാന്‍ ദിലീപ് ആണ്. ദിലീപിന്റെ ചിത്രമാണ് മാര്‍ച്ച് ഏഴാം തീയതി റിലീസിനൊരുങ്ങുന്നത്. ഇതേ ഫിയോക് ആണ് പുതിയ ചിത്രങ്ങള്‍ പ്രദര്‍ശിപ്പിക്കില്ലെന്ന് പറയുന്നത്. ഇതില്‍ തന്നെ വ്യക്തതയില്ലാത്ത പ്രശ്‌നമുണ്ട്. ആ അവ്യക്തത അവര്‍ തന്നെ ഇല്ലാതാക്കുമെന്നാണ് കരുതുന്നത്. ഞങ്ങളും യോഗം വിളിച്ചിട്ടുണ്ട്. ഉചിതമായ തീരുമാനം എടുക്കും.
