യുഎസിലെ അലബാമയില്‍ ആദ്യമായി നൈട്രജന്‍ ഗ്യാസ് ഉപയോഗിച്ച് വധശിക്ഷ നടപ്പാക്കി. കൊലപാതക കേസില്‍ പ്രതിയായ കെന്നെത്ത് യുജിന്‍ സ്മിത്ത് എന്നയാളെയാണ് നൈട്രജന്‍ ഗ്യാസ് ഉപയോഗിച്ച് വധശിക്ഷ നടപ്പാക്കിയത്. 1989ല്‍ സുവിശേഷകന്റെ ഭാര്യയെ കൊലപ്പെടുത്തിയ കേസിലായിരുന്നു ഇയാളെ വധശിക്ഷയ്ക്ക് വിധിച്ചത്.
‘നൈട്രജന്‍ ഹൈപോക്‌സിയ” എന്നറിയപ്പെടുന്ന ശിക്ഷാരീതി നടപ്പിലാക്കാന്‍ കോടതി ഉത്തരവിട്ടത് ആദ്യമായാണ്. നേരത്തെ 2022ല്‍ രാസവസ്തു കുത്തിവെച്ച് സ്മിത്തിന്റെ വധശിക്ഷ നടപ്പാക്കാന്‍ ശ്രമിച്ചിരുന്നെങ്കിലും പരാജയപ്പെട്ടിരുന്നു. അതിന് പിന്നാലെയാണ് ‘നൈട്രജന്‍ ഹൈപോക്‌സിയ” എന്ന രീതി ഉപയോഗിച്ച് വധശിക്ഷ നടപ്പാക്കിയത്. ജനുവരി 25നായിരുന്നു വധശിക്ഷ നടപ്പാക്കിയത്.
അമേരിക്കയിലെ 50 സംസ്ഥാനങ്ങളഇല്‍ 27 എണ്ണത്തില്‍ മാത്രമാണ് വധശിക്ഷ നിയമപരമായിട്ടുള്ളത്. ഇതില്‍ ‘നൈട്രജന്‍ ഹൈപോക്‌സിയ” നിയമപരമായിട്ടുള്ള അമേരിക്കയിലെ മൂന്ന് സംസ്ഥാനങ്ങളില്‍ ഒന്നാണ് അലബാമ.
നേരത്തെ മിസ്സിസിപ്പി, ഒക്ലഹോമ എന്നീ സംസ്ഥാനങ്ങളിലും നൈട്രജന്‍ ശ്വസിപ്പിച്ച് വധശിക്ഷ നടപ്പാക്കാന്‍ അനുമതിയുണ്ടെങ്കിലും ഇതുവരെ പ്രയോഗിച്ചിട്ടില്ല. നൈട്രജന്‍ ശ്വസിപ്പിച്ചാണ് വധശിക്ഷ രീതി. ഈ രീതി ഉപയോഗിച്ച് ആദ്യമായി വധ ശിക്ഷ നടപ്പാക്കുന്ന സംസ്ഥാനമായി അലബാമ.
നൈട്രജന്‍ ഹൈപോക്‌സിയ രീതി വഴി വധശിക്ഷ നടപ്പാക്കുന്നത് തടയണമെന്ന് ആവശ്യപ്പെട്ട് കെന്നത്ത് സ്മിത്ത് കോടതിയെ സമീപിച്ചെങ്കിലും യുഎസ് ജില്ലാ ജഡ്ജി ആര്‍ ഓസ്റ്റിന്‍ ഹഫക്കര്‍ തള്ളുകയായിരുന്നു.
അലബാമയില്‍ പാസ്റ്ററിന്റെ ഭാര്യ എലിസബത്ത് സെന്നറ്റിനെ കൊലപ്പെടുത്തിയതിനാണ് ഇയാളെ വധശിക്ഷയ്ക്ക് വിധിച്ചത്. കേസില്‍ മറ്റൊരു പ്രതിയുടെ വധശിക്ഷ 2010ല്‍ നടപ്പാക്കിയിരുന്നു. 45 കാരിയായ യുവതിയുടെ നെഞ്ചില്‍ എട്ട് തവണയും കഴുത്തിന്റെ ഇരുവശത്തും ഒരു തവണയും കുത്തേറ്റതായി കണ്ടെത്തിയിരുന്നു.
