പത്തനംതിട്ട മൈലപ്രയിലെ വയോധികനായ വ്യാപാരിയെ കടയ്ക്കുള്ളില്‍ കൊലപ്പെടുത്തിയ നിലയില്‍ കണ്ടെത്തിയ സംഭവത്തില്‍ പ്രത്യേക അന്വേഷണ സംഘം കേസ് അന്വേഷിക്കും. കൊലപാതകത്തിന് പിന്നില്‍ വന്‍ ആസൂത്രണം നടന്നതായാണ് പൊലീസിന്റെ പ്രാഥമിക നിഗമനം. മോഷണം നടത്തുന്നതിനിടെ ഉണ്ടായ കൊലപാതകമാണ് എന്നാണ് പൊലീസ് അനുമാനിക്കുന്നത്.
മൈലപ്ര സ്വദേശിയായ ജോര്‍ജ് ഉണ്ണുണിയാണ് മരിച്ചത്. 73 വയസായിരുന്നു. കടയില്‍ നിന്ന് പണവും ജോര്‍ജിന്റെ കഴുത്തിലെ മാലയും നഷ്ടപ്പെട്ടിട്ടുണ്ടെന്ന് പ്രാഥമിക പരിശോധനയില്‍ വ്യക്തമായിരുന്നു.
വായില്‍ തുണി തിരുകി കൈയ്യും കാലും കസേരയില്‍ കെട്ടിയിട്ട നിലയിലാണ് മൃതദേഹം കണ്ടെത്തിയത്. കടയിലെ സിസിടിവി ഹാര്‍ഡ് ഡിസ്‌കും കാണാതായിട്ടുണ്ട്.
മൈലപ്ര ബാങ്കിന്റെ സെക്രട്ടറിയുടെ പിതാവാണ് മരിച്ച ജോര്‍ജ്. എല്ലാ ദിവസവും ആറ് വൈകീട്ട് ആറ് മണിയോടെ കടയടച്ച് പോകാറാണ് പതിവ്. ജോര്‍ജിനെ കൂട്ടാന്‍ കൊച്ചുമകന്‍ കടയില്‍ എത്തിയപ്പോഴാണ് മരിച്ച നിലയില്‍ കണ്ടെത്തിയത്.
