ക്ഷേമ പെന്‍ഷന്‍ കിട്ടാത്തതിനെ തുടര്‍ന്ന് യാചനാസമരം നടത്തിയ തനിക്കെതിരെ സിപിഎം മുഖപത്രം ദേശാഭിമാനി നടത്തിയ വാര്‍ത്തയില്‍ ഇപ്പോള്‍ നടത്തിയ ഖേദപ്രകടനം അംഗീകരിക്കാനാവില്ലെന്ന് മറിയക്കുട്ടി.
വ്യാജപ്രചരണത്തിനെതിരെ ഹൈക്കോടതിയെ സമീപിക്കുന്നതില്‍ മാറ്റമില്ല. ഭൂമിയില്ലെന്ന് വില്ലേജ് ഓഫീസര്‍ സാക്ഷ്യപത്രം നല്‍കിയതിനെ തുടര്‍ന്നാണ് മറിയക്കുട്ടി ഹര്‍ജി നല്‍കാന്‍ ഒരുങ്ങുന്നത്. ദേശാഭിമാനി വാര്‍ത്തയില്‍ ഉണ്ടെന്ന തരത്തില്‍ പ്രചരിപ്പിച്ച സ്ഥലം വേണമെന്നും കൃത്യമായി പെന്‍ഷന്‍ നല്‍കാന്‍ നടപടിയുണ്ടാകണമെന്നും മറിയക്കുട്ടി ആവശ്യപ്പെടുന്നുണ്ട്.
‘പെന്‍ഷന്‍ കിട്ടുന്നില്ലെന്ന് പറഞ്ഞ് യാചനാസമരം നടത്തിയ മറിയക്കുട്ടി താമസിക്കുന്ന വീടും പുരയിടവും ഇളയമകള്‍ പി സി പ്രിന്‍സിയുടെ പേരിലാണുള്ളത്. ഈ മകള്‍ വിദേശത്താണെന്ന രീതിയില്‍ ദേശാഭിമാനിയില്‍ വന്ന വാര്‍ത്ത പിശകാണ്. മറിയക്കുട്ടിയുടെ സഹോദരി റെയ്ച്ചല്‍ വര്‍ഷങ്ങളായി അമേരിക്കയിലാണ് താമസം ഇതാണ് തെറ്റിദ്ധരിക്കാന്‍ ഇടയാക്കിയത്.
മറിയക്കുട്ടിക്ക് സ്വന്തമായി ഭൂമിയുണ്ടെന്നും ഇവരുടെ മകള്‍ പ്രിന്‍സി വിദേശത്താണ് തമാസിക്കുന്നതെന്നും വാര്‍ത്ത വരാനിടയായതില്‍ ഖേദിക്കുന്നു,’ എന്നാണ് ദേശാഭിമാനി തിരുത്തി വാര്‍ത്ത നല്‍കിയത്.
ഭൂമിയുണ്ടെന്ന വാര്‍ത്തയ്ക്ക് പിന്നാലെ, തന്റെ പേരില്‍ ഉണ്ടെന്ന് പറയപ്പെടുന്ന ഭൂമി കണ്ടെത്തി നല്‍കണമെന്ന് ആവശ്യപ്പെട്ട് മറിയക്കുട്ടി വില്ലേജ് ഓഫീസില്‍ അപേക്ഷ നല്‍കിയിരുന്നു. തുടര്‍ന്ന് മറിയക്കുട്ടിയുടെ പേരില്‍ ഭൂമി ഇല്ലെന്ന് ചൂണ്ടിക്കാട്ടി വില്ലേജ് ഓഫീസര്‍ കത്ത് നല്‍കുകയും ചെയ്തു.
‘പെന്‍ഷന്‍ മുടങ്ങിയെന്ന് പറഞ്ഞ് കോണ്‍ഗ്രസ് നേതാക്കള്‍ പിച്ചയെടുപ്പിച്ച മറിയക്കുട്ടിക്ക് ലക്ഷങ്ങളുടെ സ്വത്തുണ്ടെന്ന് കണ്ടെത്തല്‍. സ്വന്തമായി രണ്ട് വീടുണ്ട്. അതില്‍ ഒരു വീട് അടിമാലി ഇരുന്നേറക്കറില്‍ 5000 രൂപ വാടകയ്ക്ക് നല്‍കിയിരിക്കുന്നു. പഴംമ്പിള്ളിച്ചാലില്‍ ഒന്നര ഏക്കര്‍ സ്ഥലമുണ്ട്. മറിയക്കുട്ടിയുടെ മക്കളും സഹോദരങ്ങളുമുള്‍പ്പെടെ വിദേശത്തുണ്ട്. ഈ വസ്തുതകള്‍ മറച്ചുവെച്ചാണ് അരി വാങ്ങാന്‍ ഗതിയില്ലാതെ ഭിക്ഷയെടുക്കേണ്ടിവന്നു എ്‌ന കളവുമായി മറിയക്കുട്ടി ചാനലുകള്‍ക്ക് മുമ്പില്‍ എത്തിയത് കോണ്‍ഗ്രസിന്റെ രാഷ്ട്രീയ നാടകത്തിന് കുടപിടിച്ച് ചട്ടിയുമായി തെരുവിലിറങ്ങി അവര്‍ സ്വയം അപഹാസ്യയായി,’ എന്നായിരുന്നു ദേശാഭിമാനിയുടെ വാര്‍ത്ത.
