ആലുവയില് അഞ്ച് വയസുകാരിയെ തട്ടിക്കൊണ്ടു പോയി പീഡിപ്പിച്ച് കൊലപ്പെടുത്തിയ സംഭവത്തില് പ്രതി അസ്ഫാക്ക് ആലം കുറ്റക്കാരനെന്ന് കോടതി വിധി. പ്രതിക്കെതിരെ ചുമത്തിയ 16 കുറ്റങ്ങളും പ്രോസിക്യൂഷന് തെളിയിച്ചു.
പ്രതിക്കുള്ള ശിക്ഷ നവംബര് ഒന്പത് വ്യാഴാഴ്ച പ്രഖ്യാപിക്കും. പ്രതിക്ക് പരമാവധി ശിക്ഷ വേണമെന്ന് പ്രോസിക്യൂഷന് ആവശ്യപ്പെട്ടു. പ്രതി നേരത്തെ സമാന കുറ്റം ചെയ്തിട്ടുള്ള ആളാണെന്നും പ്രോസിക്യൂഷന് കോടതിയില് പറഞ്ഞു.
ജൂലൈ 28നാണ് ആലുവയില് അഞ്ചുവയസുകാരി കൊല്ലപ്പെട്ടത്. ആലുവ മാര്ക്കറ്റിനടുത്തുള്ള ചതുപ്പ് പ്രദേശത്തേക്ക് കുട്ടിയെ വീട്ടില് നിന്നും ഇറക്കി കൊണ്ട് വന്ന് ബലാത്സംഗം ചെയ്ത് കൊലപ്പെടുത്തുകയായിരുന്നു.
മൃതദേഹം കല്ലുകൊണ്ട് ഇടിച്ച് മുഖം ചെളിയിലേക്ക് അമര്ത്തിയിരുന്നു. കുട്ടിയെ കാണാതായ അന്ന് രാത്രി തന്നെ സിസിടിവി ദൃശ്യങ്ങള് നോക്കി അസ്ഫാക്കിനെ പൊലീസ് പിടികൂടിയിരുന്നു. കൊലപാതകം, ബലാത്സംഗം, തെളിവ് നശിപ്പിക്കല് അടക്കം 15 വകുപ്പുകള് ചുമത്തിയാണ് കുറ്റപത്രം സമര്പ്പിച്ചത്. അതേവേഗതയില് വിചാരണയും പൂര്ത്തീകരിച്ചു. 99 സാക്ഷിമൊഴികളടക്കം 645 പേജുകളുള്ള കുറ്റപത്രമാണ് കോടതിയില് സമര്പ്പിച്ചത്.
