ഉത്തര്പ്രദേശില് സഹപാഠികളെ കൊണ്ട് അധ്യാപിക തല്ലിച്ച മുസ്ലിം വിദ്യാര്ത്ഥിയെ കേരളത്തില് പഠിപ്പിക്കാന് തയ്യാറാണെന്ന് കേരള വിദ്യാഭ്യാസമന്ത്രി വി. ശിവന്കുട്ടി. കേരളം കുട്ടിയെ സ്വാഗതം ചെയ്യുന്നുവെന്ന് വി. ശിവന്കുട്ടി തിരുവനന്തപുരത്ത് പറഞ്ഞു.
മതത്തിന്റെ പേരില് മറ്റു വിദ്യാര്ഥികളെക്കൊണ്ട് അധ്യാപികയുടെ നിര്ദേശപ്രകാരം കുട്ടിയെ ഭീകരമായി മര്ദിക്കുന്നതു സമൂഹമാധ്യമങ്ങളിലൂടെ നാം കണ്ടതാണ്. നിസ്സാര വകുപ്പുകള് ചുമത്തിയാണു പൊലീസ് കേസെടുത്തത്. തല്ലിച്ചതു ശരിയാണെന്ന നിലപാടാണ് അധ്യാപികയുടേത്. ആ കുട്ടിയെ സംബന്ധിച്ചിടത്തോളം പഠിത്തം അനിശ്ചിതത്വത്തിലാണ്. മര്ദനത്തിനിരയായ കുട്ടിയും മാതാപിതാക്കളും സമ്മതിച്ചാല് വിദ്യാര്ഥിയെ കേരളത്തില് പഠിപ്പിക്കാന് സര്ക്കാരും വിദ്യാഭ്യാസ വകുപ്പും തയാറാണ് എന്നാണ് മന്ത്രി പറഞ്ഞത്.
സംഭവത്തില് അടിയന്തര നടപടി ആവശ്യപ്പെട്ട് ഉത്തര്പ്രദേശ് മുഖ്യമന്ത്രി യോഗി ആദിത്യനാഥിന് വി. ശിവന്കുട്ടി കത്തയച്ചിരുന്നു. സംഭവം ഞെട്ടിക്കുന്നതാണെന്ന് കത്തില് ചൂണ്ടിക്കാട്ടുന്നു. മതേതര ആശയങ്ങളെ നെഞ്ചോട് ചേര്ക്കാന് കേരളം പ്രതിജ്ഞാബദ്ധമാണെന്ന് മന്ത്രി അറിയിച്ചു.
ഒരു വിദ്യാഭ്യാസ സ്ഥാപനത്തിനുള്ളില് ഇത്തരം വിഭജനപരമായ പ്രവര്ത്തനങ്ങള് പ്രോത്സാഹിപ്പിക്കുന്നതിന് ഉത്തരവാദികളായ വ്യക്തികള്ക്കെതിരെ കര്ശനമായ നടപടിയെടുക്കണമെന്നും കാലതാമസം പാടില്ലെന്നും കത്തില് ആവശ്യപ്പെടുന്നുണ്ട്.
