കേരളത്തിന് രണ്ടാമത്തെ വന്ദേഭാരത് ട്രെയിന്‍ ഉടന്‍ അനുവദിക്കുമെന്ന് സൂചന. ലോക്കോ പൈലറ്റുമാര്‍ക്ക് ഉള്‍പ്പെടെ ചെന്നൈയില്‍ പരിശീലനം നല്‍കുന്നുണ്ട്. മംഗളൂരുവില്‍ പിറ്റ്‌ലൈനും സജ്ജമാക്കിയിട്ടുണ്ട്.
പാലക്കാട് ഡിവിഷനില്‍ നിന്നുള്ള രണ്ട് ലോക്കോ പൈലറ്റുമാര്‍ക്ക് ചെന്നൈ ആവഡിയില്‍ പരിശീലനം ആരംഭിച്ചിട്ടുണ്ട്. സാങ്കേതിക കാര്യങ്ങള്‍ നോക്കുന്ന മെക്കാനിക്കല്‍ വിഭാഗവും ചെന്നൈയില്‍ പരിശീലനത്തിലാണ്.
തിരുവനന്തപുരം-മംഗളൂരു റൂട്ടില്‍ ചില വണ്ടികളുടെ സമയം മാറ്റിയത് ഇതിന്റെ സൂചനയാണന്നാണ് വിലയിരുത്തല്‍.
നിലവില്‍ തിരുവന്തപുരത്ത് നിന്ന് പുറപ്പെടുന്ന വന്ദേഭാരത് പുലര്‍ച്ചെ 5.20 നാണ് പുറപ്പെടുന്നത്. ഉച്ചയ്ക്ക് 1.20ന് കാസര്‍ഗോഡെത്തും. ഇതേസമയം രണ്ടാം വന്ദേഭാരത് മംഗളൂരുവില്‍ നിന്നായിരിക്കും പുറപ്പെടുക എന്നാണ് സൂചന. ഉച്ചയ്ക്ക് തിരുവനന്തപുരത്ത് എത്തി തിരിച്ച് രണ്ട് മണിയോടെ പുറപ്പെട്ടാല്‍ രാത്രി 11 മണിക്കുള്ളില്‍ മംഗളൂരുവില്‍ എത്തും.
തിരുവനന്തപുരം-കണ്ണൂര് ജനശദാബ്ദി ആലപ്പുഴ കണ്ണൂര് എക്‌സിക്യൂട്ടീവ് തുടങ്ങിയ വണ്ടികളുടെ സമയം പുനക്രമീകരിച്ചിരുന്നു.
