മലപ്പുറം പുളിക്കലില്‍ പ്രവര്‍ത്തിക്കുന്ന പ്ലാസ്റ്റിക് മാലിന്യ സംസ്‌കരണ പ്ലാന്റിനെതിരെ സിപിഐഎം. ഫാക്ടറി പൂട്ടണമെന്ന് ചൂണ്ടിക്കാട്ടി സിപിഐഎം സമരത്തിലേക്ക് കടക്കുകയാണ്.
വിവാദ ഫാക്ടറി പൂട്ടണമെന്ന് ചൂണ്ടിക്കാട്ടി പ്ലാന്റിന് മുന്നില്‍ പാര്‍ട്ടി ഫ്‌ളക്‌സും കാണാം. പുളിക്കല്‍ ലോക്കല്‍ കമ്മിറ്റിയുടെ നേതൃത്വത്തിലാണ് സമരം ചെയ്യാനൊരുങ്ങുന്നത്.
ജനങ്ങളുടെ ആശങ്ക കണക്കിലെടുത്താണ് പാര്‍ട്ടി തീരുമാനമെന്ന് പുളിക്കല്‍ ലോക്കല്‍ സെക്രട്ടറി നജ്മുദ്ദീന്‍ പറഞ്ഞു. ജനവാസമേഖലയില്‍ കമ്പനി തുറന്ന് പ്രവര്‍ത്തിക്കാന്‍ പാടില്ലെന്നാണ് പാര്‍ട്ടി നിലപാടെന്നും നജ്മുദ്ദീന്‍ പറഞ്ഞു.
മാലിന്യ പ്ലാന്റിനെതിരെ പലകുറി പരാതി നല്‍കിയിട്ടും നടപടിയുണ്ടാവാത്ത മനോവിഷമത്തിലാണ് ഇടത് സഹയാത്രികനും സാംസ്‌കാരിക പ്രവര്‍ത്തകനുമായ റസാഖ് പായമ്പ്രോട്ട് വില്ലേജ് ഓഫീസിന് മുന്നില്‍ ജീവനൊടുക്കിയത്. ഇതിന് പിന്നാലെ പാര്‍ട്ടിക്കെതിരെ വലിയ തോതിലുള്ള പ്രതിഷേധം ഉയര്‍ന്നിരുന്നു. റസാഖിന്റെ ആവശ്യം പാര്‍ട്ടിയും കൈക്കൊണ്ടില്ലെന്ന ആരോപണം ഉയര്‍ന്നിരുന്നു.
റസാഖ് പയമ്പ്രോട്ട് ആത്മഹത്യ ചെയ്ത സംഭവത്തില്‍ സിപിഐഎം നേതാക്കള്‍ക്കും പഞ്ചായത്ത് പ്രസിഡന്റിനുള്ള പങ്ക് അന്വേഷിക്കണമെന്നാവശ്യപ്പെട്ട് ഭാര്യ ഷീജ തിങ്കളാഴ്ച കൊണ്ടോട്ടി പൊലീസില്‍ പരാതി നല്‍കിയിരുന്നു.
