പരാതികളും രേഖകളും കഴുത്തില് തൂക്കി മധ്യവയസ്കന് പഞ്ചായത്ത് ഓഫീസില് മരിച്ച നിലയില്. മലപ്പുറം പുളിക്കല് പഞ്ചായത്ത് ഓഫീസിലാണ് മോയന് കുട്ടി വൈദ്യര് സ്മാരക സമിതി മുന് സെക്രട്ടറി റസാഖ് പയമ്പ്രോട്ടിനെ തൂങ്ങി മരിച്ച നിലയില് കണ്ടെത്തിയത്.
സ്വകാര്യ വ്യക്തിയുടെ പ്ലാസ്റ്റിക് മാലിന്യ പ്ലാന്റുമായി ബന്ധപ്പെട്ട് റസാഖ് പരാതി ഉന്നയിച്ചിരുന്നു. നിരവധി തവണ പരാതി നല്കുകയും സോഷ്യല് മീഡിയ വഴിയും പരാതി ആവശ്യപ്പെടുകയും ചെയ്തിരുന്നു. എന്നാല് ഇതില് അനുകൂലമായ സാഹചര്യം ഉണ്ടായിരുന്നില്ല. ഇതിന് പിന്നാലെയാണ് പരാതികളും രേഖകളും കഴുത്തില് സഞ്ചിയില് തൂക്കിയിട്ട് ഇയാളെ തൂങ്ങിമരിച്ച നിലയില് കണ്ടെത്തിയത്.
ഗ്രാമപഞ്ചായത്ത് ഓഫീസിന്റെ വരാന്തയിലാണ് തൂങ്ങിമരിച്ച നിലയില് കണ്ടെത്തിയത്. മാലിന്യപ്ലാന്റിനെതിരെ റസാഖ് പഞ്ചായത്തില് നല്കിയ പരാതികളുടെ ഫയലും മൃതദേഹത്തിന് സമീപത്ത് നിന്നും കണ്ടെത്തി.
കൊണ്ടോട്ടി പൊലീസ് സ്ഥലത്തെത്തി നടപടികള് പൂര്ത്തിയാക്കി. വ്യാഴാഴ്ച രാത്രി പഞ്ചായത്ത് ഓഫീസിലെത്തി തൂങ്ങിമരിച്ചതാണെന്ന് കരുതുന്നതായി പൊലീസ് പറഞ്ഞു.
