അയോഗ്യത സംബന്ധിച്ച കേസിലെ വിധി സ്റ്റേ ചെയ്യണമെന്നാവശ്യപ്പെട്ട് കോണ്ഗ്രസ് നേതാവ് രാഹുല് ഗാന്ധി നല്കിയ അപ്പീല് തള്ളി സൂറത്ത് കോടതി. സൂറത്ത് സെഷന്സ് കോടതിയാണ് അപ്പീല് തള്ളിയത്.
ഇതോടെ രാഹുല് ഗാന്ധി ഹൈക്കോടതിയെ സമീപിക്കും. നിയമപരമായി നിലനില്പ്പില്ലാത്ത കേസിലാണ് സിജെഎം കോടതി വിധി പറഞ്ഞതെന്നാണ് രാഹുല് സെഷന്സ് കോടതിയില് വാദിച്ചത്.
താന് കുറ്റക്കാരനാണെന്ന വിധി സ്റ്റേ ചെയ്യണം, ശിക്ഷ രണ്ട് വര്ഷത്തേക്ക് സ്റ്റേ ചെയ്യണം എന്നീ ആവശ്യങ്ങളാണ് രാഹുല് ഗാന്ധി കോടതിയില് ആവശ്യപ്പെട്ടത്. എന്നാല് സൂറത്ത് കോടതി ഇത് തള്ളുകയായിരുന്നു.
‘മോദി’ പരാമര്ശത്തില് നല്കിയ കേസിലാണ് രാഹുല് ഗാന്ധിയെ എം.പി സ്ഥാനത്ത് നിന്ന് അയോഗ്യനാക്കിയത്. ബി.ജെ.പി എം.എല്.എ പൂര്ണേഷ് മോദി നല്കിയ അപകീര്ത്തി കേസിലാണ് സൂറത്ത് കോടതിയുടെ വിധി. 2019 ഏപ്രിലില് കോളാറില് പ്രചരണം നടത്തവെയാണ് രാഹുല് ഗാന്ധിയുടെ കേസിനാസ്പദമായ സംഭവം. നീരവ് മോദി, ലളിത് മോദി, നരേന്ദ്ര മോദി…’ എങ്ങനെയാണ് എല്ലാ കള്ളന്മാര്ക്കും എങ്ങനെയാണ് പേരില് മോദി വരുന്നത് എന്നായിരുന്നു രാഹുലിന്റെ പരാമര്ശം.
കര്ണാടകയിലെ കോളാറില് 2019ല് നടത്തിയ പ്രചരണ പരിപാടിയിലെ രാഹുല് ഗാന്ധിയുടെ പരാമര്ശം മോദി സമുദായത്തെ അപകീര്ത്തിപ്പെടുത്തുന്നതാണ് എന്ന് ആരോപിച്ചാണ് പൂര്ണേഷ് മോദി രാഹുല് ഗാന്ധിയ്ക്കെതിരെ അപകീര്ത്തി കേസ് നല്കിയത്. മാര്ച്ച് 23ന് ചീഫ് ജുഡീഷ്യല് മജിസ്ട്രേറ്റ്, കേസില് രാഹുല് ഗാന്ധിയെ ലോക്സഭ എം.പി സ്ഥാനത്ത് നിന്ന് അയോഗ്യനാക്കുകയായിരുന്നു. ഈ വിധി നിര്ത്തിവെക്കണമെന്ന് ആവശ്യപ്പെട്ടായിരുന്നു രാഹുല് ഗാന്ധിയുടെ ഹര്ജി.
