വിദ്യാർത്ഥികൾക്ക് പ്രണയിക്കാൻ ചൈനയിലെ കോളജുകൾ ഒരാഴ്ച അവധി നൽകി. രാജ്യത്തെ ജനനനിരക്ക് വർധിപ്പിക്കാനുള്ള സർക്കാരിന്റെ ശ്രമങ്ങളെ പിന്തുണയ്ക്കുന്നതിന്റെ ഭാഗമായാണ് തീരുമാനം. വിദ്യാർത്ഥികൾക്ക് പ്രണയബന്ധം ആരംഭിക്കുന്നതിനായി ഏപ്രിലിൽ ഒരാഴ്ചത്തെ അവധി നൽകാനാണ് ചൈനയിലെ ഒൻപത് കോളജുകൾ തീരുമാനിച്ചിരിക്കുന്നത്.
മിയാൻയാങ്ങ് ഫ്ലൈയിങ്ങ് വൊകേഷണൽ കോളജാണ് ആദ്യമായി പ്രണയാവധി പ്രഖ്യാപിച്ചത്. ഏപ്രിൽ ഒന്ന് മുതൽ ഏഴ് വരെ നൽകിയ അവധിയിൽ ജീവിതത്തെയും വസന്തകാലത്തെയും ആസ്വദിച്ച് അതുവഴി പ്രണയത്തിലാകാൻ വിദ്യാർത്ഥികളെ പ്രോത്സാഹിപ്പിക്കുന്നു എന്നാണ് അധികൃതർ വിശദീകരണം നൽകിയത്. അതേസമയം അവധി സമയങ്ങളിൽ വിദ്യാർത്ഥികൾക്ക് ഹോംവർക്കുകളും നൽകിയിട്ടുണ്ട്. ഡയറി എഴുതുക, യാത്രാ വിഡിയോകൾ ഉണ്ടാക്കുക എന്നിവയാണ് ഹോംവർക്ക്.
1980 മുതൽ 2015 വരെ ജനസംഖ്യ നിയന്ത്രിക്കുന്നതിൻ്റെ ഭാഗമായി ‘ഒറ്റ കുട്ടി പദ്ധതി’ ചൈന നടപ്പാക്കിയിരുന്നു. ഇതാണ് രാജ്യത്തിന് തിരിച്ചടിയായത്. തുടർന്ന് 2021ൽ മൂന്ന് കുട്ടികൾ എന്ന നിബന്ധനയിൽ എത്തിയെങ്കിലും ആളുകൾ ഇത് പരിഗണിച്ചിരുന്നില്ല. ഇതിനു പിന്നാലെയാണ് രാജ്യത്തെ ജനനനിരക്ക് വർധിപ്പിക്കാൻ സർക്കാർ വിവിധ തരത്തിലുള്ള നയങ്ങൾ നടപ്പിലാക്കുന്നത്.
