എമിറേറ്റിൽ വിശുദ്ധ റമദാൻ മാസത്തിൽ പണമടച്ചുള്ള പാർക്കിംഗ് നടത്താനുള്ള സമയം ഷാർജ മുനിസിപ്പാലിറ്റി പ്രഖ്യാപിച്ചു. ശനിയാഴ്ച മുതൽ വ്യാഴാഴ്ച്ച വരെ പണമടച്ചുള്ള പാർക്കിംഗ് സമയം രാവിലെ 8 മുതൽ അർദ്ധരാത്രി വരെ ആയിരിക്കുമെന്ന് അതോറിറ്റി അറിയിച്ചു.
ബ്ലൂ ഇൻഫർമേഷൻ സോണുകൾ ഒഴികെയുള്ള സ്ഥലങ്ങളിൽ വെള്ളിയാഴ്ചകളിൽ പാർക്കിംഗ് സൗജന്യമാണ്. അതോടൊപ്പം ഷാർജ സിറ്റി പാർക്കുകളുടെ പ്രവർത്തന സമയവും മുനിസിപ്പാലിറ്റി പ്രഖ്യാപിച്ചിട്ടുണ്ട്. പാർക്കുകൾ എല്ലാ ദിവസവും വൈകുന്നേരം നാല് മണി മുതൽ അർദ്ധരാത്രി വരെ തുറന്നിരിക്കും. കൂടാതെ എമിറേറ്റിൽ മെഡിക്കൽ സെന്ററുകളുടെ സമയവും പ്രഖ്യാപിച്ചിട്ടുണ്ട്.
അതേസമയം ഷാർജ എമിറേറ്റിലെ സർക്കാർ സ്ഥാപനങ്ങളിലെ ജീവനക്കാർക്കായുള്ള ഔദ്യോഗിക റമദാൻ പ്രവൃത്തി സമയം നേരത്തേ പ്രഖ്യാപിച്ചിരുന്നു. ജീവനക്കാർ രാവിലെ ഒൻപത് മണി മുതൽ ഉച്ചയ്ക്ക് 2.30 വരെ പ്രവർത്തിക്കണം. എമിറേറ്റിലെ സർക്കാർ സ്ഥാപനങ്ങൾക്കായി സജ്ജീകരിച്ചിരിക്കുന്ന റമദാൻ ഷെഡ്യൂൾ കൂടുതലും ഫെഡറൽ അതോറിറ്റി ഫോർ ഗവൺമെന്റ് ഹ്യൂമൻ റിസോഴ്സ് (എഫ്എഎച്ച്ആർ) പുറത്തിറക്കിയ മാർഗ്ഗനിർദ്ദേശങ്ങളാണ് പിന്തുടരുന്നത്.
മന്ത്രാലയങ്ങൾക്കും ഫെഡറൽ അധികാരികൾക്കും തിങ്കൾ മുതൽ വ്യാഴം വരെ രാവിലെ ഒൻപത് മണി മുതൽ ഉച്ചയ്ക്ക് 2.30 വരെയും വെള്ളിയാഴ്ച രാവിലെ ഒൻപത് മണി മുതൽ ഉച്ചയ്ക്ക് 12 വരെയും ഔദ്യോഗിക പ്രവൃത്തി സമയം ക്രമീകരിച്ചുകൊണ്ട് എഫ്എഎച്ച്ആർ ഒരു സർക്കുലർ പുറപ്പെടുവിച്ചിരുന്നു. കൂടാതെ സ്വകാര്യ മേഖലയിൽ പുണ്യമാസത്തിൽ ജോലി ഷിഫ്റ്റുകൾ രണ്ട് മണിക്കൂർ കുറയ്ക്കുമെന്ന് യുഎഇയുടെ മാനവ വിഭവശേഷി, എമിറേറ്റൈസേഷൻ മന്ത്രാലയം അടുത്തിടെ പ്രഖ്യാപിച്ചിരുന്നു.
