സഹപ്രവർത്തകയോട് ലൈംഗികാതിക്രമം നടത്തിയതിന് യുകെയിൽ ഇന്ത്യൻ വംശജനായ പോലീസ് ഉദ്യോഗസ്ഥന് ശിക്ഷ. യുകെ സ്കോട്ട്ലൻഡ് യാർഡിലുള്ള ഇന്ത്യൻ വംശജനായ അർചിത് ശർമയാണ് ലൈംഗികാതിക്രമക്കേസിൽ കുറ്റക്കാരനെന്ന് തെളിഞ്ഞത്. മെയ് അഞ്ചിനായിരിക്കും ഇയാൾക്കെതിരായ ശിക്ഷ വിധിക്കുക
ഡ്യൂട്ടിയിലായിരിക്കുന്ന സമയത്ത് സഹപ്രവർത്തകയ്ക്കെതിരെ ലൈംഗികാതിക്രമം നടത്തിയെന്നായിരുന്നു ഇയാൾക്കെതിരെയുള്ള കേസ്. സംഭവം നടന്നെന്ന് പറയുന്ന വർഷം ഇയാൾ ലണ്ടൻ മെട്രോപൊളിറ്റൻ പൊലീസിലെ നോർത്ത് ഏരിയ ബേസിക് കമാൻഡ് യൂണിറ്റിലെ പൊലീസ് കോൺസ്റ്റബിളായിരുന്നു.
2020 ഡിസംബറിലാണ് കേസിനാസ്പദമായ സംഭവം ഉണ്ടായത്. ഇതിന് പിന്നാലെ 2021 ജൂലായിൽ ഇയാളെ ഡ്യൂട്ടിയിൽ നിന്ന് പിരിച്ചുവിട്ടിരുന്നു. തുടർന്ന് കഴിഞ്ഞ ദിവസം ലണ്ടനിലെ വുഡ് ഗ്രീൻ ക്രൗൺ കോടതിയിൽ നടന്ന വിസ്താരത്തിലാണ് ഇയാൾ കുറ്റക്കാരനാണെന്ന് കണ്ടെത്തിയത്.
