കടുത്ത സാമ്പത്തിക പ്രതിസന്ധി നേരിടുന്ന പാകിസ്ഥാന് ചൈന 130 കോടി ഡോളര് ( ഏകദ്ദേശം പതിനായിരം കോടിയിലേറെ ഇന്ത്യന് രൂപ) വായ്പ നല്കി. പാകിസ്ഥാന് ധനകാര്യമന്ത്രി ഇഷാഖ് ധര് ആണ് ഇക്കാര്യം അറിയിച്ചത്. ഇന്ഡസ്ട്രിയല് ആന്റ് കൊമേഴ്സ്യല് ബാങ്ക് ഓഫ് ചൈന മൂന്ന് ഗഡുക്കളായാണ് പാകിസ്ഥാൻ വായ്പ കൈമാറുക.
ആദ്യത്തെ ഗഡുവായ 500 മില്യണ് പാകിസ്ഥാൻ സെന്ട്രല് ബാങ്കിനു ലഭിച്ചതായി മന്ത്രി അറിയിച്ചു. അതേസമയം ഇത് പാകിസ്താന്റെ വിദേശനാണ്യ കരുതല് ശേഖരം വര്ദ്ധിപ്പിക്കുമെന്നാണ് വിലയിരുത്തുന്നത്. കടുത്ത സാമ്പത്തിക പ്രതിസന്ധിയിലൂടെ കടന്നു പോകുന്ന പാകിസ്ഥാൻ ചൈനീസ് സർക്കാരിന്റെ സഹായത്തിലാണ് പിടിച്ചുനില്ക്കുന്നത്.
ഏകദേശം 700 മില്യണ് ഡോളറിന്റെ സാമ്പത്തിക സഹായം ഇതിനോടകം ചൈനയില് നിന്ന് പാകിസ്ഥാന് ലഭിച്ചിട്ടുണ്ടെന്നാണ് റിപ്പോർട്ട്. കൂടാതെ സാമ്പത്തിക വിടവ് നികത്തുന്നതിന് ഈ സാമ്പത്തിക വര്ഷം 500 കോടി ഡോളറിന്റെ വിദേശ ധനസഹായം കൂടി ആവശ്യമാണെന്നും ഇഷാഖ് ധര് പറഞ്ഞു. അന്താരാഷ്ട്ര നാണയനിധിയുമായി ( ഐഎംഎഫ്) ഇസ്ലാമാബാദ് കരാര് ഒപ്പിട്ടതിനു ശേഷം മാത്രമേ പാകിസ്ഥാന് കൂടുതല് വിദേശ ധനസഹായം ലഭിക്കൂ. അതേസമയം ഉടന് തന്നെ കരാറില് ഒപ്പു വയ്ക്കുമെന്നും മന്ത്രി പറഞ്ഞു.
