എമിറാത്തി ബഹിരാകാശ സഞ്ചാരിയായ സുൽത്താൻ അൽ നെയ്ദിയും സംഘവും ഫ്ലോറിഡയിലെ കെന്നഡി ബഹിരാകാശ കേന്ദ്രത്തിലെത്തി. ബഹിരാകാശത്തേക്ക് പറക്കുന്ന ചരിത്രപരമായ ദിവസത്തിന് മുന്നോടിയായാണ് ബഹിരാകാശ കേന്ദ്രത്തിലെത്തിയത്. അതേസമയം നേരത്തേ നിശ്ചയിച്ചിരുന്ന വിക്ഷേപണത്തീയതിയിൽ മാറ്റം വരുത്തിയിട്ടുണ്ടെന്നാണ് റിപ്പോർട്ടുകൾ. നേരത്തേ നിശ്ചയിച്ചിരുന്ന തിയതി മാറ്റി ഒരു ദിവസം മുൻപേ, ഫെബ്രുവരി 27 തിങ്കളാഴ്ചയിലേക്ക് മാറ്റി. 27 ന് രാവിലെ 10.45 നാണ് സംഘം അന്താരാഷ്ട്ര ബഹിരാകാശനിലയത്തിലേക്ക് യാത്ര തിരിക്കുക.
അതേസമയം ദീർഘകാല ബഹിരാകാശ ദൗത്യത്തിന് പോകുന്ന ആദ്യത്തെ യുഎഇ സഞ്ചാരിയാണ് 42 കാരനായ ഡോ അൽ നെയ്ദി. അൽ ഐനിൽ സ്വദേശിയായ അല് നെയാദി മുൻ ഐടി പ്രൊഫസര്കൂടിയാണ്. ആറ് മാസത്തെ ദൗത്യമാണ് സംഘത്തിനുളളത്. 2018 മുതൽ യാത്രയ്ക്കുളള തയ്യാറെടുപ്പിലായിരുന്നു സുൽത്താൻ അൽ നെയ്ദി. കഴിഞ്ഞ ദിവസം അസവാനഘട്ട പരിശീലനം പൂർത്തിയാക്കി.
അൽ നെയ്ദിയും ഒപ്പമുളള മൂന്ന് സംഘാംഗങ്ങളും ടെക്സാസിലെ ഹൂസ്റ്റണിൽ ഒത്തുകൂടി. ചടങ്ങിനിടെ സ്പേസ് എക്സ് ഫാൽക്കൺ 9 റോക്കറ്റിൽ ബഹിരാകാശത്തേക്ക് പറക്കാനുള്ള ആവേശവും അവർ പങ്കുവച്ചു. ദൗത്യത്തിനായി സഹായിക്കുകയും പിന്തുണയ്ക്കുകയും ചെയ്ത എല്ലാവരോടും അൽ നയ്ദിയും സംഘവും നന്ദി അറിയിക്കുകയും ചെയ്തു.
