സ്റ്റേഡിയം ഓഫ് ദി ഇയർ പുരസ്‌കാരത്തിനുള്ള നോമിനേഷൻ പട്ടികയിൽ ഖത്തർ ലോകകപ്പ് ഫൈനൽ വേദിയായ ലുസൈൽ സ്റ്റേഡിയം. സ്റ്റേഡിയം ഡിബി വെബ്‌സൈറ്റിൻ്റെ സ്റ്റേഡിയം ഓഫ് ദ് ഇയർ പുരസ്‌കാരത്തിലേയ്ക്കാണ് ഡിസൈനിങ്ങിലും നിർമിതിയിലും ഘടനയിലുമെല്ലാം സവിശേഷതകൾ നിറഞ്ഞ 2022 ലോകകപ്പ് ഫൈനൽ വേദിയായ ലുസൈൽ സ്റ്റേഡിയം നാമനിർദേശം ചെയ്യപ്പെട്ടിരിക്കുന്നത്.
ആഗോള തലത്തിൽ 23 സ്റ്റേഡിയങ്ങളാണ് പട്ടികയിൽ ഇടം പിടിച്ചിരിക്കുന്നത്. ഓൺലൈൻ റേറ്റിങ് അനുസരിച്ചാണ് പുരസ്‌കാരത്തിന് അർഹമായ സ്റ്റേഡിയം തെരഞ്ഞെടുക്കുക. പട്ടികയിലെ 23 എണ്ണത്തിൽ 12 സ്റ്റേഡിയങ്ങൾ ചൈനയുടേതാണ്.
അറബ്-ഗൾഫ് മേഖലയിൽ നിന്ന് ചുരുക്കപ്പട്ടികയിൽ ഇടം നേടിയിരിക്കുന്നത് ഖത്തറിലെ ലുസൈൽ സ്റ്റേഡിയവും ഇറാഖിലെ അൽമിന, അൽ സവ്ര സ്റ്റേഡിയങ്ങളുമാണ്. മാർച്ച് 14 വരെയാണ് വോട്ടെടുപ്പ്, വെബ്‌സൈറ്റിൽ പ്രവേശിച്ച് വോട്ടു രേഖപ്പെടുത്താം.
