കുവൈറ്റിലേക്ക് പ്രവാസികളുടെ പ്രവേശനം ക്രമീകരിക്കാൻ ‘വീസ കുവൈറ്റ്’ എന്ന പുതിയ ഇലക്ട്രോണിക് ആപ്പ് പുറത്തിറക്കി ആഭ്യന്തര മന്ത്രാലയം. ആപ്പിൻ്റെ പരീക്ഷണാടിസ്ഥാനത്തിലുള്ള ഉപയോഗം രാജ്യത്ത് തുടങ്ങിക്കഴിഞ്ഞു. പ്രവാസികളുടെയും, സന്ദർശകരുടെയും എൻട്രി സ്റ്റാറ്റസ് പരിശോധന, ഇലക്ട്രോണിക് മാർഗങ്ങളിലൂടെ എൻട്രി വീസകൾക്ക് പ്രവേശനാനുമതി ഉൾപ്പടെയുള്ള നടപടിക്രമങ്ങൾ ത്വരിതപ്പെടുത്തുകയാണ് ലക്ഷ്യം.
നടപടിക്രമങ്ങൾ കൂടുതൽ കൃത്യതയാർന്നതാക്കുന്നതിനും, പ്രവാസികൾക്കും, സന്ദർശകർക്കും കുവൈറ്റിലേക്കുള്ള വിമാനങ്ങളിൽ കയറുന്നതിന് മുൻപ് ഇവയുടെ സാധുത ഉറപ്പ് വരുത്തുന്നതിനും ഈ ആപ്പ് സഹായിക്കും. കുവൈറ്റിലേക്ക് പ്രവാസികൾ പ്രവേശിക്കുന്നത് ക്രമപ്പെടുത്താനും എൻട്രി വീസകളുമായി ബന്ധപ്പെട്ടുള്ള തിരിമറികൾ ഒഴിവാക്കാനുമാണ് കുവൈറ്റ് ആഭ്യന്തര വകുപ്പ് ഈ സംവിധാനം പ്രവർത്തനക്ഷമമാക്കുന്നത്.
വിവിധ രാജ്യങ്ങളിൽ കുറ്റവാളികളായവർ, പിടികിട്ടാപ്പുള്ളികൾ, പകർച്ചവ്യാധികളുള്ളവർ എന്നിവരുടെ കുവൈറ്റിലേക്കുള്ള പ്രവേശനം തടയാനും ആപ്പ് ഉപയോഗിക്കുമെന്ന് അധികൃതർ വ്യക്തമാക്കി. കുവൈറ്റ് വിദേശകാര്യ മന്ത്രാലയം, കുവൈറ്റിൽ പ്രവർത്തിക്കുന്ന വിമാനകമ്പനികൾ, വിദേശരാജ്യങ്ങളിലെ കുവൈറ്റ് എംബസികൾ എന്നിവയുമായി സഹകരിച്ചാണ് ആഭ്യന്തര മന്ത്രാലയം ഈ സംവിധാനം പ്രാവർത്തികമാക്കുന്നത്. ഭാവിയിൽ പ്രവാസികളുടെ കുവൈറ്റിലേക്കുള്ള പ്രവേശനം പൂർണ്ണമായും ഈ ആപ്പിൻ്റെ സഹായത്തോടെയാകുമെന്ന് മന്ത്രാലയം സൂചിപ്പിച്ചു.
