റോഡ്സ് ആൻഡ് ട്രാൻസ്പോർട്ട് അതോറിറ്റിയുടെ (ആർടിഎ) ദുബായ് ടാക്സി കോർപ്പറേഷൻ (ഡിടിസി) ശാരീരിക വെല്ലുവിളികൾ നേരിടുന്ന വിദ്യാർത്ഥികൾക്കായി സ്കൂൾ സർവീസുകൾ നടത്തുന്ന വാഹനങ്ങളും സേവനങ്ങളും മെച്ചപ്പെടുത്തി. എമിറേറ്റ്സ് സ്കൂൾ എസ്റ്റാബ്ലിഷ്മെൻ്റുമായി (ഇഎസ്ഇ) സഹകരിച്ച് നടത്തുന്ന ഈ നീക്കം പൊതുവിദ്യാലയങ്ങളിലെ സ്കൂൾ ബസ് സർവീസുകളിൽ നിന്നുള്ള ഗുണഭോക്താക്കളുടെ എണ്ണം വർധിപ്പിക്കാനാണ് ലക്ഷ്യമിടുന്നത്.
സ്കൂളുകളുടെ ആവശ്യത്തിനും ഇത്തരം വിദ്യാർത്ഥികളുടെ എണ്ണത്തിനും അനുസരിച്ച് സ്കൂൾ ബസുകൾ സർവീസ് നടത്തും. അതേസമയം ആളുകളുടെ ഗതാഗത ആവശ്യങ്ങൾ നിറവേറ്റുന്ന ഉയർന്ന തലത്തിലുള്ള സേവനങ്ങൾ നൽകാൻ ഡിടിസി താൽപ്പര്യപ്പെടുന്നുണ്ടെന്ന് ഔദ്യോഗിക വൃത്തങ്ങൾ ചൂണ്ടികാട്ടി.
വിദ്യാഭ്യാസ സമ്പ്രദായത്തിൽ ശ്രദ്ധ കേന്ദ്രീകരിച്ചുകൊണ്ട് വിവിധ മേഖലകളിൽ നിന്നും ഇത്തരത്തിലുള്ള വിദ്യാർത്ഥികളുടെ പങ്കാളിത്തം ഉറപ്പു വരുത്താനും വർദ്ധിപ്പിക്കുന്നതിനുമുള്ള യുഎഇയുടെ ശ്രമങ്ങളെ പിന്തുണയ്ക്കാൻ ഡിടി സി പ്രതിജ്ഞാബദ്ധരാണെന്ന് ഔദ്യോഗിക വൃത്തങ്ങൾ അറിയിച്ചു. ഇത്തരത്തിൽ വെല്ലുവിളികൾ നേരിടുന്ന കുട്ടികളെ അവരുടെ വിദ്യാഭ്യാസ തടസ്സങ്ങൾ മറികടക്കാൻ സഹായിക്കുക എന്നത് സാമൂഹികവും ദേശീയവുമായ കടമയാണ്. കൂടാതെ കുട്ടികളുടെ ഉന്നമനത്തിനായുള്ള ഈ ഉത്തരവാദിത്തം നിറവേറ്റുന്നതിനുള്ള ശ്രമത്തിൽ ഉറച്ചുനിൽക്കുന്നുവെന്ന് ദുബായ് ടാക്സി കോർപ്പറേഷൻ, ആർടിഎ സിഇഒ മൻസൂർ റഹ്മ അൽ ഫലാസി പറഞ്ഞു.
പബ്ലിക് സ്കൂളുകളിലെ വിദ്യാർത്ഥികൾക്ക് വേണ്ടി എട്ട് ബസുകളാണ് സർവീസ് നടത്തുക. നാല് വിദ്യാർത്ഥികൾ വീതം യാത്ര ചെയ്യാൻ പറ്റുന്ന തരത്തിലുള്ളതാണ് പുതിയ ബസുകൾ. രണ്ട് വീൽചെയറുകൾക്കുള്ള മുറിയും രണ്ട് ഇരിപ്പിടങ്ങളും ഇതിലുണ്ട്. ശാരീരിക വെല്ലുവിളികൾ നേരിടുന്ന വിദ്യാർത്ഥികളെ ബാക്കിയുള്ള വിദ്യാർത്ഥികളുമായി സംയോജിപ്പിക്കാനുള്ള പദ്ധതികളുടെ ഭാഗമായാണിത്. ദുബായിലെ വിദ്യാർത്ഥികളുടെ സഞ്ചാരം സുഗമമാക്കുന്നതിന് സുഖസൗകര്യങ്ങളുടെയും സുരക്ഷയുടെയും ഏറ്റവും ഉയർന്ന മാനദണ്ഡങ്ങൾ ഈ സേവനം പാലിക്കുന്നുണ്ടെന്ന് അൽ ഫലാസി കൂട്ടിച്ചേർത്തു.
ഈ വിദ്യാർത്ഥികൾക്ക് മികച്ച അന്താരാഷ്ട്ര നിലവാരമനുസരിച്ചുള്ള അക്കാദമിക് പഠനത്തിൽ പിന്തുണയ്ക്കുന്ന സംയോജിത സേവനങ്ങൾ നൽകാൻ ശ്രമിക്കുന്നതായി ഇഎസ്ഇ കോർപ്പറേറ്റ് സേവന മേഖലയുടെ ആക്ടിംഗ് എക്സിക്യൂട്ടീവ് ഡയറക്ടർ ഖാലിദ് അൽ മസ്മി പറഞ്ഞു. ശാരീരിക വെല്ലുവിളികൾ നേരിടുന്ന വിദ്യാർത്ഥികളുടെ വീടുകളിലേക്ക് നേരിട്ട് സർവീസ് നടത്തും. ഈ റൂട്ടുകളിൽ ഡിടിസി സ്കൂൾ ബസ് സർവീസുകളാണ് ഉണ്ടാവുക. വീൽചെയർ എടുക്കാൻ സജ്ജീകരിച്ചിരിക്കുന്ന ബസുകളിൽ സഹപാഠികളോടൊപ്പം അവർക്ക് സുഗമമായ ഗതാഗതവും ഉറപ്പാക്കുന്നു.
