കൊച്ചി മുസിരിസ് ബിനാലെയുടെ ആവേശം ആകാശത്തും അലയടിക്കുന്നു. ബിനാലെയുടെ സന്തോഷം ലോകത്തെ അറിയിക്കുകയാണ് എയർ ഇന്ത്യ എക്സ്പ്രസ്. ഇരുപത്തിയഞ്ചടി നീളമുള്ള ചിത്രം വിമാനത്തിന്റെ ചിറകിൽ വരച്ചാണ് എയർ ഇന്ത്യ എക്സ്പ്രസ് ബിനാലെയുടെ ഭാഗമായത്.
ആർട്ടിസ്റ്റ് ജിഎസ് സ്മിതയാണ് അക്രലിക് പെയിന്റ്റിംഗിൽ വിരിഞ്ഞ ഈ ടെയിൽ ആർട്ടിന്റെ സൃഷ്ടാവ്. വർണാഭമായ പ്രകൃതിദൃശ്യങ്ങളുടെ പുനരാവിഷ്കരണമാണിത്. ഒരു ടൈംലൈൻ ചിത്രീകരിക്കുന്ന രീതിയിലാണ് പെയിൻറിങ്. ഒരേസമയം ചെറു ജീവികളുടെ സൂക്ഷ്മതയും കുന്നുകളുടെയും പൂമെത്തകളുടെയും വിശാലതയും ചിത്രത്തിൽ സംയോജിക്കുന്നതാണ് ഈ മെറ്റാഫിസിക്കൽ പെയിൻറി ങ്ങെന്ന് ചിത്രകാരി ജി എസ് സ്മിത പറഞ്ഞു. ചിത്രം മന്ത്രി പി എ മുഹമ്മദ് റിയാസ് ഉദ്ഘാടനം ചെയ്തു.
അതേസമയം എയർ ഇന്ത്യ ബിനാലെയുടെ ഭാഗമായത് വിനോദസഞ്ചാര മേഖലക്ക് ഏറെ ഗുണം ചെയ്യുമെന്ന് മന്ത്രി അഭിപ്രായപ്പെട്ടു. തിരുവനന്തപുരത്ത് വച്ച് നടന്ന ചടങ്ങിൽ എയർ ഇന്ത്യ സിഇഒയും എയർ ഏഷ്യ ഇന്ത്യ പ്രസിഡന്റുമായ അലോക് സിങ്, കൊച്ചി ബിനാലെ ഫൗണ്ടേഷൻ പ്രസിഡന്റ്ബോസ് കൃഷ്ണമാചാരി തുടങ്ങിയവർ പങ്കെടുത്തു. കൂടാതെ കൂടുതൽ വിമാനങ്ങളിൽ ടെയിൽ ആർട്ട് നടത്തുമെന്ന് എയർ ഇന്ത്യ എക്സ്പ്രസ് അധികൃതർ അറിയിച്ചു.
