862 കോടി ചിലവഴിച്ച് നിർമിച്ച പുതിയ പാർലമെൻ്റ് മന്ദിരത്തിൻ്റെ ചിത്രങ്ങൾ പുറത്ത് വിട്ടു. ടാറ്റ പ്രൊജക്ട്സ് ലിമിറ്റഡാണ് പുതിയ മന്ദിരം പണികഴിപ്പിച്ചത്. സെൻട്രൽ വിസ്ത റീഡെവലപ്മെൻ്റ് പ്രൊജക്ടിൻ്റെ ഭാഗമായാണ് പുതിയ കെട്ടിടം. വലിയ ഹാളുകളും കമ്മിറ്റി റൂമുകളും ലൈബ്രറിയും വലിയ പാർക്കിംഗ് സ്പേസും അടങ്ങുന്നതാണ് പുതിയ മന്ദിരം. പുതിയ മന്ദിരത്തിൽ 888 ലോക്സഭാ സീറ്റുകളും 384 രാജ്യസഭാ സീറ്റുകളുമുണ്ട്. ഈ വർഷം മാർച്ചിലായിരിക്കും പുതിയ മന്ദിരം ഉദ്ഘാടനം ചെയ്യുകയെന്ന് ഔദ്യോഗിക വൃത്തങ്ങൾ അറിയിച്ചു.
അതേസമയം ദേശീയ പക്ഷിയായ മയിലിൻ്റെ മാതൃകയിലാണ് ലോക്സഭ പണി കഴിപ്പിച്ചിരിക്കുന്നത്. മയിൽ പീലിയെ അനുസ്മരിപ്പിക്കുന്ന തരത്തിലുള്ള ഡിസൈനാണ് ഇവിടെത്തെ സീലിംഗിന് നൽകിയിരിക്കുന്നത്. ഫ്ലോറിന് പച്ച നിറവുമാണ് നൽകിയിട്ടുള്ളത്. എന്നാൽ രാജ്യ സഭയ്ക്ക് ദേശീയ പുഷ്പമായ താമരയുടെ ചിത്രപ്പണിയാണ് നൽകിയിരിക്കുന്നത്. ഭിന്നശേഷിക്കാർക്ക് പോലും ആരുടേയും സഹായമില്ലാതെ ഉപയോഗിക്കാൻ പറ്റുന്ന സജ്ജീകരണങ്ങളോടെയാണ് പുതിയ മന്ദിരം പണി കഴിപ്പിച്ചിരിക്കുന്നത്.
പുതിയ മന്ദിരം പണികഴിപ്പിച്ചതെന്തിന്?
കഴിഞ്ഞ ഏതാനും വർഷങ്ങളായി പാർലമെൻ്റിൽ ജോലി ചെയ്യുന്നവരുടേയും സന്ദർശകരുടേയും എണ്ണത്തിൽ വലിയ തോതിലുള്ള വർധനവുണ്ടായിരുന്നു. ഇക്കാരണത്താലാണ് പുതിയ മന്ദിരം പണിയാൻ തീരുമാനിച്ചത്. 1927 ൽ ബ്രിട്ടീഷ് ആർകിടെക്ട് എഡ്വിൻ ലൂട്ടെൻസും ഹർബർട്ട് ബേക്കറും ചേർന്നാണ് നിലവിലെ മന്ദിരം നിർമിച്ചത്. അതേസമയം പഴയ മന്ദിരം ഇനി മ്യൂസിയമാക്കി മാറ്റുമെന്നാണ് റിപ്പോർട്ട്.
